Kamer van Koophandel en Nijverheid Aruba | Chamber of Commerce and Industry Aruba

07-2020 – KvK ta sosten e decision di Gobierno pa cera frontera pa yuda preveni e corona virus

Oranjestad – Camara di Comercio y Industria Aruba (KvK) ta sostene Gobierno di Aruba y su decision pa cera frontera pa pasaheronan (cu excepcion di residentenan di Aruba) pa asina yuda contene e COVID-19 (Corona virus) a base di e situacion delicado cu Aruba tambe ta wordo confronta cune. Esaki ta un decision dificil cu tin un impacto grandi riba nos economia pero necesario pa e bienestar di e pueblo. Nos tur hunto lo mester yuda otro pa nos surpasa e consecuencianan. KvK ta y ta keda den contacto cu Gobierno pa yuda conseha pa proteha e economia di Aruba. Gobierno a urgi pa pueblo tuma pasonan pa preveni cu e virus sigui plama. Alabes ta pidi pa sigui e consehonan di cuido necesario cu ta inclui pa purba mantene na e distanciamento social. KvK ta opina cu e ta importante pa pueblo en general y comercio di Aruba purba sigui e conseho di Gobierno manera Minister Presidente a informa den un rueda di prensa diadomingo anochi ultimo y tuma e pasonan di higiena necesario e.o. pa tur negoshi tene nan luga limpi, desinfecta y pone hand sanitizers disponibel pa e cliente.

KvK ta pidi pueblo pa tuma e puntonan di prevencion na serio y keda alerta pa sintomanan di e COVID-19. Mantene contacto minimo cu publico. KvK lo sigui informa pueblo y atende cu tur pregunta y peticion cu por tin. KvK lo keda den dialogo cu Gobierno riba e topico aki y ta keda monitor e situacion y su impacto pa cu e necesidad di comercio en general.

Aruba, 16 maart 2020
Camara di Comercio y Industria (KvK)

Scroll To Top