06-2019 – KvK a tene evento Business Plaza – Step Forward! Pa e comerciantenan

Oranjestad – Diasabra 19 di januari ultimo Camara di Comercio y Industria (KvK) a organisa su di 7 edicion di e evento Business Plaza – Step Forward! E evento a bay hopi bon y un biaha mas KvK ta trece informacion cu ta al caso pa publico y comunidad comercial. Durante Business Plaza – Step Forward! a ofrece diferente presentacion y tambe a brinda e oportunidad pa haya informacion y conseho gratis encuanto establece y expande bo negoshi. Un danki ta bay na Aruba Bank N.V. cu ta e patrocinado principal cu a yuda haci e evento aki posibel.

E evento ta uno gratis y via di Business Plaza – Step Forward! KvK kier brinda informacion y guia na e empresario cu ta desea di expande su liña di producto of servicionan y cu talbes kier restructura su negoshi of tin intencion pa expande cu mercado internacional.

E programa a cuminsa cu un discurso di Presidente di Directiva di KvK, sr. Kawish Misier cu a yama e publico un cordial bon bini na Business Plaza – Step Forward!

Siguientemente a sigui un panel di oradornan cu a contribui na e programa. Sr. Welhous di Aruba Bank N.V. a hiba palabra na publico presente. Sra. Wever y otro coleganan di CEDE Aruba a duna un presentacion riba strategianan pa incrementa participacion di negoshi den CSR. Sra. Croes-Daryanani di Rexa Studio a conta encuanto inicio y expansion di su empresanan y prome cu pauze sra. Velthuizen di KvK a duna un presentacion encuanto digitalisacion di servicionan di KvK.

E pauze a duna oportunidad na esnan presente pa por a intercambia idea y crea of mehora relacion comercial. Tambe por a busca informacion cerca instancianan invita presente cu nan booth. Departamento di Asunto Economico, Exprodesk, Universidad di Aruba y CEDE Aruba tabata esnan hunto cu e conseheronan di KvK cu tabata disponibel pa duna informacion na e publico presente.

Despues di e pauze, a continua cu presentacion di sra. Holmond di KvK cu a elabora riba nombramento y retiro di un director di un entidad legal. Sr. Daal a conta riba logística di import, export y e retonan cu bo ta confronta. Pa clausura e panel sra. Pieters y sra. Giel di Departamento di Impuesto a splica mas encuanto reforma fiscal.

E siguiente evento Business Plaza lo tuma luga riba diasabra 29 di juni 2019 caminda KvK lo organisa Business Plaza-Get Started! dirigi na e persona cu kier cuminsa un negoshi. Sigui KvK via Facebook of www.arubachamber.com pa pronto haya mas informacion tocante e evento aki! Pa mas informacion tocante edicionnan di Business Plaza y otro eventonan di KvK, por tuma contacto cu Business Information & Support na 582-1566 ext. 27/35/42/30of manda un e-mail pa: businessinfo@arubachamber.com.

Aruba, 22 di januari 2019
Camara di Comercio y Industria (KvK)

Scroll To Top

Events

    Make an appointment

Sitemap | Privacy Policy | Disclaimer | By orbitalnets