Kamer van Koophandel en Nijverheid Aruba | Chamber of Commerce and Industry Aruba

05-25 Pa evita gastonan adicional: KVK TA URGI PA PAGA TUR CONTRIBUCION ANUAL HABRI PROME CU 19 DI MEI 2025

Oranjestad – Camara di Comercio y Industria Aruba (KvK) ta informa cu entrante 19 di mei 2025, un suma di Afl. 10 lo wordo aplica riba tur cuenta cu contribucion anual (“jaarlijkse bijdrage”) habri. E medida aki ta parti di e esfuerso continuo di KvK pa aumenta cumplimento legal pa asina KvK por mantene un administracion financiero sostenibel.

Kico ta e contribucion anual (“jaarlijkse bijdrage”)?
Tur entidad legal cu ta inscribi den e Registro Comercial tin un obligacion legal pa paga un contribucion anual. E suma ta depende di e inversion haci den e negoshi, pa cual ta existi un clasificacion stipula pa ley (Ley di Registro Comercial “Handelsregisterverordening”). E suma pa contribucion anual ta varia entre Afl. 96,= pa e negoshinan cu inversion minimo, te cu Afl. 1275,= pa e empresanan cu capital grandi.

E contribucion anual por wordo paga via e cuenta di MyChamber, transferencia di banco riba e number di cuentanan aki bou, of na oficina di KvK.
Aruba Bank              Number di cuenta 112.354.6
Banco di Caribe       Number di cuenta 814771.01
CMB                           Number di cuenta 61179906
RBC                            Number di cuenta 7700000090061769

Pakico lo cobra un suma adicional di Afl. 10?
Conforme e ley di Registro Comercial, e ultimo dia pa paga e contribucion anual pa aña 2025 tabata 15 di maart ultimo. Lo duna tur entidad registra den e Registro Comercial un oportunidad mas pa haci pago di tur cuenta habri sin costo adicional te cu 16 di mei proximo. Pero, entrante 19 di mei  2025 lo aplica e suma adicional di Afl. 10,= pa tur tipo di entidad (e.o. eenmanszaak, VBA, NV, fundacion y asociacion) cu ta registra den e Registro Comercial y cu falta paga e contribucion anual pa aña 2025 of añanan anterior.  E suma adicional aki ta relaciona cu e gasto administrativo extra pa maneha e cobransa di e cuentanan atrasa.

Alabes, KvK lo por sigui cu e caminda legal, manera ta stipula den ley, pa asina cobra e suma habri. Entrante 16 di juli 2025 KvK lo evalua tur caso y eventualmente lo por manda esaki pa deurwaarder cu lo sigui cu e proceso legal por medio di un “dwangbevel”.  Esaki lo trece gastonan adicional pa e propietario di e negoshi.

Compania cu no ta activo mas
Si tin un compania cu ta registra na KvK, pero cu esaki no ta activo mas, ta importante pa pone esaki como inactivo of cancela e negoshi den e Registro Comercial mas pronto cu ta posibel. Ley ta stipula cu e persona di e negoshi cu ta autorisa (p.e. doño di e negoshi y/o director) tin e deber di cancela e negoshi na KvK. A base di e informacion declara door di e persona autorisa, e status di e compania ta wordo cambia den e sistema di KvK. Esaki ta importante tambe ora di haci declaracion di resultadonan di negoshi (cu no ta activo) na Departamento di Impuesto. Fabor di tuma nota cu contribucion anual habri te cu e aña aki mester wordo paga prome cu por cancela e negoshi den e Registro Comercial.

MyChamber
Ta sumamente importante pa tur negoshi tin un account digital via MyChamber pa nan mes por controla e datos di e compania y alabes haci e pagonan di contribucion anual online, sin mester di acudi fisicamente na e oficina di KvK. Desde 2020 KvK a cuminsa manda e cobransa pa e contribucion anual digitalmente via e online account di e companianan, y pesey ta haci un apelacion urgente na tur negoshi cu ainda no tin un online account pa percura pa regla esaki mas pronto posibel via MyChamber. E instruccionnan pa crea un account ta poni riba e website di KvK (bao FAQ’s), pero den caso cu no logra por tuma contacto libremente cu KvK via e chattool riba e website di KvK, na tel. 582-1566, ext. 342/335/330, of via e-mail businessinfo@arubachamber.com.

KvK ta urgi tur comerciante pa percura pa e contribucion anual te cu 2025 wordo paga y asina evita gastonan innecesario y/o cu e servicionan di KvK no por wordo brinda. KvK lo manda recordatorio y eventualmente lo por sigui caminda legal manera menciona anteriormente pa cu falta di cumplimento di e negoshi.

Pa por sa mas encuanto cuentanan habri, por tuma contacto cu KvK na 582-1566 ext 343/336 of manda un e-mail na financial@arubachamber.com.

Aruba, 6 di mei 2025
Camara di Comercio y Industria (KvK)

Scroll To Top