Kamer van Koophandel en Nijverheid Aruba | Chamber of Commerce and Industry Aruba

05-2023-Anochi informativo pa crea mas lasonan commercial cu Colombia KVK TA ORGANISA UN ANOCHI DI INFORMACION ENCUANTO E MISION COMERCIAL DI ARUBA PA COLOMBIA NA LUNA DI MEI PROXIMO

Oranjestad – Camara di Comercio y Industria Aruba (KvK) den colaboracion cu Departamento di Asunto Economico, Comercio y Industria (DEZHI) y Minister di Economia, Comunicacion y Desaroyo Sostenibel, ta organisa riba 6 april 2023 un anochi informativo tocante un mision comercial pa Colombia cu lo tuma luga den luna di mei proximo. E intencion ta pa comerciantenan di Aruba bishita e cuidad di Bogotá cu e meta principal pa cera acuerdonan comercial entre e negoshinan di Aruba y di Colombia. Durante e anochi informativo lo duna tur informacion necesario y alabes invita e comerciante pa participa na e mision comercial. E mision aki ta un oportunidad fantastico pa empresarionan cu ta buscando pa amplia nan horizonte y investiga mercado nobo.

Mision comercial

E mision comercial lo tuma luga dia 22 pa 26 di mei na Colombia y lo consisti di B2B meetings cu empresarionan di Colombia. E mision ta combina cu un evento di 2 dia di matchmaking. Otro puntonan di e programa ta sesionnan di informacion tocante e logistica y e impuesto aplicabel pa exporta for di Colombia, combina cu un excursion y bishita na negoshinan di Bogotá. Durante e matchmaking lo combina diferente negoshi di Aruba cu negoshi di Colombia a base di nan potencial y similaridad. Nos comerciantenan por haya mas informacion di e producto y servicionan cu e negoshinan na Colombia ta brinda. Tambe e comerciantenan di Aruba lo haya e oportunidad pa intercambia idea y traha sinergia pa asina crea mas relacion comercial.

Anochi informativo

E anochi informativo aki lo tuma luga den auditorio di KvK riba diahuebs 6 di april di 5.30pm-7.30 pm. Durante e anochi aki lo brinda informacion di e obhetivo y programa di e mision, detayes di costo y registracion. E anochi lo wordo clausura cu un sesion di pregunta y contesta, networking y despues lo brinda oportunidad pa tur esnan interesa haci pre-registracion pa e mision comercial.

E mision aki ta un bon oportunidad pa crea laso comercial cu Colombia y oportunidad pa diversifica producto y/of servicio. KvK ta invita tur comerciante local cu kier expande y forma parti di e mision comercial pa Bogotá pa asisti na e anochi informativo. Por registra pa e anochi informativo via e link aki https://forms.gle/QMqySfBb5fmiHzA7A y forma parti di un tremendo oportunidad comercial. Pa mas informacion por tuma contacto cu departamento di Business Information & Support via email: businessinfo@arubachamber.com of via tel: 5821566 etx. 30/35/42.

Aruba, 03 april 2023

Camara di Comercio y Industria (KvK)

Scroll To Top