Kamer van Koophandel en Nijverheid Aruba | Chamber of Commerce and Industry Aruba

04-22 – KVK A REUNI CU SAN NICOLAS BUSINESS ASSOCIATION (SNBA)

Oranjestad – Recientemente directiva di Camara di Comercio y Industria Aruba (KvK) a reuni cu directiva di San Nicolas Business Association (SNBA). Puntonan di agenda tabata entre otro e desaroyo di San Nicolas y e diferente retonan cu te ainda ta enfrentando.

SNBA a indica cu e interes pa desaroya y inverti na San Nicolas ta creciendo y ya tin proyectonan cu ta den preparacion y algun otro cu ta pendiente. A intercambia informacion cu ta concerni e proyectonan di Hotel cu ta andando. Tanto KvK como SNBA ta mira esaki como positivo pa San Nicolas. Ta primordial pa ricibi e cooperacion necesario for di e departamentonan gubernamental y e sosten di e Ministernan corespondiente. E futuro di e refineria ainda no ta conoci y a señala cu, teniendo cuenta cu e gran interes pa diferente proyectonan, e desaroyo na San Nicolas mester bay na un manera ordena pa asina proteha e cultura y identidad di San Nicolas. Den e cuadro aki SNBA a crea un plataforma/aliansa cu ta trahando riba e proceso pa por presenta un concepto integral/“blue print” pa asina por tin control y structura den e proceso. SNBA tambe a duna informacion di  locual nan a hasi durante e ultimo aña, por ehempel e introduccion di un free online store pa yuda e negoshinan na San Nicolas.

SNBA ta desea un cooperacion mas estrecho cu KvK pa sondea e posibilidadnan pa KvK por apoya SNBA y San Nicolas en general. KvK lo bay evalua e proposicionnan cu SNBA a trece dilanti y a acorda di keda den contacto y bini huntu frecuentemente. KvK ta contento cu e plannan cu tin pa cu San Nicolas y sigur lo duna su aporte unda cu por pa contribui na e desaroyo na San Nicolas.

Aruba, 11 februari 2022

Camara di Comercio y Industria (KvK)

Scroll To Top