03-25 – MISION COMERCIAL ARUBA – PANAMA TABATA UN EXITO

Oranjestad – Dianan 12 te cu 14 di februari 2025, un delegacion comercial di Aruba a participa den e mision comercial ‘Dutch Caribbean Meets Panama’ na Panama , un evento exitoso cu a fortifica lazonan economico y comercial entre e islanan di Reino Hulandes y Panama.

E mision comercial a wordo organisa door di Holland House Panama, den colaboracion cu e Embahada di Reino Hulandes na Panama y Camara di Comercio y Industria Aruba (KvK), e mision tabata enfoca riba oportunidadnan comercial y inversion den sectornan strategico manera logistica, importacion y exportacion, turismo, servicio financiero y digitalisacion. Cu mas di 70 empresario di Aruba, Curaçao, Bonaire, Sint Maarten, Sint Eustatius y Saba, e mision a habri hopi posibilidad pa negoshi y colaboracion. E delegacion comercial di Aruba a consisti di 11 comerciante, representando 9 compania di Aruba. E delegacion aki tabatin casi 60 cita cu comerciantenan di Panama y a keda hopi satisfecho cu e citanan ricibi.

Mision comercial
Panama ta un Hub di America, promoviendo crecemento den infrastructura maritimo, logistica, servicio financiero y innovacion digital. Pa empresarionan di Aruba, esaki tabata un oportunidad ideal pa explora mercado nobo, amplia nan red di contacto y reforsa laso economico.

E delegacion comercial tabata consisti di varios empresario ofreciendo producto y/of servicio den diferente ramo e.o.: importacion di productonan alimenticio, construccion y mantencion di pool, servicionan administrativo, consultancy servicionan di VIP, y servicionan di ingenieria. E citanan cu e empresarionan na Panama a wordo organisa pa Holland House Panama. Holland House Panama ta un organisacion cu ta traha pa fortalece relacionnan di negoshi entre Hulanda y Panama. Alabes ta stimula comercio internacional y inversion.

Un Programa Completo
Durante e tres dianan di e mision, e delegacion comercial a participa den presentacionnan, bishitanan strategico y reunionnan cu comerciantenan di Panama, resultando den oportunidadnan concreto pa futuro colaboracion.

E programa di e delegacion comercial a cuminsa oficialmente diaranson, 12 di februari 2025.

Dia 1- 12 di februari 2025: Introduccion na Mercado Panameño
E dia a inicia cu un sesion informativo, durante e desayuno, titula ‘Doing Business in Panama’, unda expertonan di sector priva y gubernamental a duna un resumen di e infrastructura comercial y financiero di Panama. ProPanama, un agencia cu ta promove exportacion y inversion na Panama, a presenta informacion clave den logistica y e mercado Panameño. Despues a sigui mas presentacionnan interesante tocante digitalisacion y innovacion na Panama. E dia a sigui cu un bishita na e Free Trade Zone di Panama Pacifico, caminda e empresarionan a haya oportunidad di conoce personalmente cu e proyecto interesante aki.

E anochi a culmina cu un networking event na residencia di e Embahador di Reino Hulandes na Panama, sr. Sander Cohen, caminda e delegacion por a conecta cu representantenan di Gobierno, comerciantenan Panameño y comerciantenan di e otro islanan presente. Sr. Cohen a yama tur comerciante bon bini y sr. Diederik Kemmerling, presidente di directiva di KvK, tambe a gradici tur e organisadornan y e participantenan di e mision aki.

Alabes, sr. Kemmerling a duna e Embahador di Reino Hulandes na Panama, den nomber di KvK, un pintura di Aruba ariba canvas, como gesto pa su amabilidad y hospitalidad na nos comerciantenan durante nan bishita na su residencia.

Dia 2 – 13 di februari 2025: Matchmaking y e Canal di Panama
E siguiente dia tabata enfoca riba matchmaking sessions, unda cada participante di e delegacion a reuni cu mas o menos 4 – 6 empresarionan Panameño. Durante e reunionnan aki, e empresarionan di Aruba por a cera conoci cu empresarionan estableci na Panama y diferente palabracion pa futuro cooperacion a inicia. Representantenan di KvK tambe a reuni cu diferente organisacionnan pa intercambia informacion encuanto comercion na Panama y Aruba.

Despues di un networking lunch, e delegacion a bishita e Miraflores Locks di e Canal di Panama. Miraflores locks ta un di e tres ‘locks’ na Panama, unda barconan ta subi y baha riba nivel di awa pa por pasa entre e oceano Atlantico y Pacifico.

E anochi a conclui cu un cena na unda e delegacion por a sigui intercambia ideanan den un ambiente informal.

Dia 3 – 14 di februari 2025: Oportunidadnan den Colon Free Zone
E ultimo dia tabata dedica na un bishita na Colon Free Trade Zone, un di e hubnan di importacion y redistribucion mas grandi den hemisferio occidental. Durante e bishita, e delegacion a ricibi un presentacion di e bentahanan di opera den e free zone y e posibilidadnan pa exportacion for di Caribe Hulandes.

Finalmente, e mision comercial aki a habri hopi posibilidad pa colaboracion y expande comercio entre e dos regionnan. Empresarionan di Aruba y alabes di e otro islanan den Caribe Hulandes a expresa nan satisfaccion cu e contactonan estableci y e oportunidadnan cu a surgi durante e mision.

Gradicimento
KvK kier a gradici Holland House Panama pa e colaboracion cu a haci e mision comercial aki uno sumamente exitoso. Tambe un danki na tur e comerciantenan di Aruba cu a participa na e mision aki y a haci e mision uno sumamente exitoso!

KvK ta sumamente contento cu e resultado di e mision, y ta sigi contribui na busca oportunidadnan pa empresario local y aporta na e promocion di nos isla como un destino empresarial. Por wak portret di e mision ariba nos facebook page: www.facebook.com/arubachamber.