020-2021 – KvK a tene su prome reunion cu Minister di Asuntonan Economico

Oranjestad – Ayera, 5 di october 2021, directiva di Camara di Comercio y Industria Aruba (KvK) a reuni pa prome biaha cu e Minister di Asuntonan Economico, Comunicacion y Desaroyo Sostenibel, sr. Geoffrey Wever. Puntonan di agenda tabata entre otro e “Landspakket” Aruba caminda ta importante pa KvK, huntu cu e demas stakeholders, wordo y keda activamente envolvi den e procesonan di ehecucion, ya cu lo tin impacto directo y indirecto pa comercio y Aruba su economia.

KvK a menciona e importancia di e reforma fiscal, incluyendo revision di e sistema di impuesto di importacion y a referi na e situacion actual caminda cu e prijsnan di container y di productonan importa ta sigui aumenta y probablemente lo resulta den un nivel halto di inflacion. KvK a expresa tambe e importancia pa optimalisa e clima di inversion mas lihe posibel y introduci aspectonan pa mehora compliance y fomenta un “level playing field” combatiendo e competencia injusto di actividadnan comercial ilegal. Alabes, KvK a remarca cu gobierno a haci algun cambio den e leynan laboral, pero cu esaki no a percura den e necesidad di comercio pa crea flexibilidad. Por ehempel a restringi e contracto defini na un termino mas cortico di 24 luna en bes di 36 luna y a extende e pauze entre contractonan di 3 pa 6 luna cu ta hacie mas dificil pa un compania mantene y/of tuma empleado den servicio pa un periodo ora mester di empleado temporal. E cambionan laboral ta trece consecuencia financiero adicional pa e compania cu e no por carga mirando e clima financiero precario.

KvK a señala algun punto di atencion importante cu ta regarda e Registro Comercial den cuadro di e cambionan y adaptacionnan den e Codigo Civil (Boek II) cu a drenta na vigor na januari 2021 y teniendo cuenta cu lo bay tin mas cambio basa riba e recomendacionnan di Caribbean Financial Action Task Force (CFATF) pa combati labamento di placa y terorismo. Entre otro, tur entidad legal di AVV’s activo mester wordo transforma dentro di un periode di 3 aña pa un otro entidad huridico. AVV’s cu no ta activo mas, mester wordo disolvi. Aparte di esey, KvK a expresa e intencion di desaroya productonan nobo y organisa mas workshop y training pa por provee den e necesidad di e comerciantenan pa haya mas informacion y conocemento di cierto aspectonan cu por yuda e compania mehora su operacion. Informacion relevante pa comerciantenan ta p.e. e cambionan di ley laboral, e proceso con pa lanta un compania, innova un compania, traha un plan financiero y metodo pa amplia e ganashi.

Minister a indica cu e lo formula y publica su vision economico prome cu fin di e luna aki, na unda su enfoce ta riba un economia resiliente y atractivo pa inversionistanan. Actionnan concreto lo bay wordo tuma pa berdaderamente stimula cierto sectornan prometedor. Lo bay tin atencion debidamente tambe pa e projecto di incubation y desaroyo economico di e area di San Nicolas. Minister a pidi KvK pa duna input pa yega na un plan realistico y cu ta wordo carga tambe door di sector comercial. KvK lo sigui reuni cu diferente sectornan comercial pa haya feedback y asina identifica e retonan cu ta stroba actividadnan comercial y oportunidadnan pa fortifica nos economía, pa por trece esakinan bao di atencion di gobierno.

KvK ta gradici Minister pa e oportunidad di por a dialoga y ta confía cu lo tin un bon colaboracion y reunionnan regular cu e mandatario pa asina KvK haya e informacion relevante y por duna su aporte y contribui na e maneho di e Minister y pa ambos banda keda bon informa.

Aruba, 6 di october 2021

Camara di Comercio y Industria (KvK)

Scroll To Top

Events

    Upcoming Events

    There are no upcoming events at this time.

    Make an appointment

Sitemap | Privacy Policy | Disclaimer | By orbitalnets