014-2024 – ARUBA CHAMBER BUSINESS ISLAND EVENT 2024 EXITOSO
Oranjestad – Diahuebs ultimo, 24 di october 2024, Camara di Comercio y Industria Aruba (KvK) a organisa su conocido evento titula ‘Aruba Chamber Business Island Event’. E biaha aki a organisa esaki riba e prestigioso Renaissance Island.
Aruba Chamber Business Event ta e gran evento anual di KvK cu ta pone enfasis riba e empresario local y cu ta duna atencion na topico cu ta impacta nos economia y e mundo di haci negoshi en general. E aña aki a conta cu 2 orador, un internacional y un local. Pa e edicion aki e topico tabata ‘Navigating the future of work’.
KvK ta gradici Caribbean Mercantile Bank N.V. y Elite Productions & Entertainment pa aporta grandemente como patrocinado principal di e evento. Alabes, ta gradici Guardian Group, Setar N.V., Qredits, Flexo Manpower Services, POV Productions y Renaissance Wind Creek Aruba Resort como colaboradonan di e evento aki.
Cu un bon structura y programa dinamico
E evento a cuminsa cu palabranan di bon bini door di e maestra di ceremonia, sra. Hilyann Croes y despues e discurso di Presidente di Directiva di KvK, sr. Diederik Kemmerling.
E prome presentacion a wordo duna door di sra. Crescenzia Biemans, Chief Corporate Officer (COO) di Bucuti & Tara Beach Resort. Sra. Biemans a papia tocante e integracion di Artifical Intelligence (AI) den negoshi y programanan diseña pa retene empleadonan na un compania. Sra. Biemans a comparti su experiencia como COO, enfatizando con AI por optimisa eficiencia di operacion di un compania. Alabes, e la recomenda pa inverti den e trahado, e ser humano, y pa mantene flexibilidad y enfoca riba mantene e trahado pa un tempo largo por medio di p.e. un salario competitivo, posibilidad pa studia y un bon plan di salud. Finalmente, e ta recomenda pa companianan defini nan balornan, identifica e desafionan di operacion y uza AI pa optimalisa e procesonan aki.
Siguientemente, sr. Maarten Naaijkens, un ehecutivo cu amplio experienca, a papia tocante con e mundo di trabou ta cambiando, con e impacto di technologianan nobo lo tin riba e trabounan den futuro, y cual skills e trahado lo mester tin den futuro. E la elabora con nos por forma un forza laboral cu capacidad pa e era digital nobo. E la amplia riba e retonan cu nos tin nos dilanti: vergrijzing di nos populacion, stagnacion di productividad y un mercado di trabou limita na unda tin hopi trabou pero no suficiente empleado. Sr. Naaijkens a splica cu Gen Z ta e solucion. E la remarca cu berdad nan tin un otro perspectiva cu e otro generacionnan, pero ta e generacion cu mas desea di sigui siña. Alabes, e la splica cu pa atrae empleadonan di e generacion aki, mester adapta y ahusta e metodonan di busca empleadonan nobo, y e focus mester ta mas riba skills y no riba educacion.
Por ultimo, un panel cu ta consisti di sra. Jeanire Rampart, Multi-Property Human Resources Manager na The Ritz-Carlton, Aruba y na The St. Regis Aruba resort, sr. Wilfred Ras, Commercial Director di Total Services N.V. y Managing Director di Nos Isla Private Tours, y sra. Margie Kelders, F&B Supervisor di Gianni’s Group. E panelistanan a contesta preguntanan, y cada uno a discuti y comparti su punto di bista den nan area di experticio.
Despues di cada presentacion, a duna e publico e oportunidad pa haci pregunta na e orador. Alabes, a rifa un day pass a cortesia di Renaissance Wind Creek Aruba Resort entre e participantenan.
Publico presente sigur a haya hopi informacion valido con pa adapta nan negoshi na e mundo di trabou cu ta cambiando y con pa adapta na e cambionan aki. Maestra di ceremonia a clausura e parti oficial cu algun palabra y a gradici cada orador y tur esnan presente pa haci e evento uno exitoso.
Clausura cu network y bon ambiente musical
Despues di e tremendo presentacionnan a sigui cu e parti social caminda por a discuti riba e topico di e anochi y crea of reforsa e lasonan comercial den un ambiente ameno. Esnan presente por a comparti nan experiencia acompaña pa hors d’oeuvres y open bar. Pa termina e evento publico presente por a disfruta di e bon entretenimento musical di Chris Kross, caminda publico por a goza, di su musica den un esfera ameno riba escenario.
Aruba, 29 di october 2024
Camara di Comercio y Industria (KvK)
Events
Make an appointment
