013-2024 – Aruba Chamber Business Island Event 2024: “Navigating the Future of Work”
Oranjestad – Camara di Comercio y Industria Aruba (KvK) ta anuncia e fecha y detayenan di e ‘Aruba Chamber Business Island Event’ pa e edicion di 2024. Esaki lo tuma lugar otro siman diahuebs, 24 di oktober 2024 riba Renaissance Island. Pa prome biaha lo tene un Business Event riba e prestigioso Renaissance Island.
E meta di e evento ta pa trece empresarionan, profesionalnan y lidernan den e industria hunto. E evento lo enfoca riba crea conexionnan valioso, mehora e desaroyo di negoshi y duna informacion valioso na empresarionan. E evento no ta destina solamente pa e doñonan di negoshi of miembronan di e ekipo di maneho pero tambe pa esnan cu tin influencia riba e exito di e organisacion. Awendia ta hopi importante pa keda innova pa por keda competitivo den un mercado cu constantemente ta desaroya.
Programa
E topico pa e edicion aki lo ta “Navigating the Future of Work” – elaborando riba aspectonan manera e.o. strategianan innovativo pa recluta y retene empleado cu un focus riba e generacion di millenials y Gen Z, perpectivanan di “work-life balance”, solucionnan pa escasez di trahadornan (cualifica) cu ta tene e bienestar di e ser humano centraal, integracion di AI den compania, y “cutting-edge” tools digital pa e operacion di un negoshi.
Pa e anochi a invita orador local, Crescenzia Biemans y un orador internacional Maarten Naaijkens. E anochi lo cuminsa cu presentacionnan sumamente interesante di e dos invitadonan, sigui pa un panel cu lo discuti y comparti cada un di nan punto di bista den nan area di experticio. E panel ta consisti di Wilfred Ras (Commercial Director na Total Services N.V. & Managing Director na Nos Isla Private Tours), Jeanire Rampart (Multi-Property Human Resources Manager na The Ritz-Carlton, Aruba & The St. Regis Aruba Resort) y Margie Kelders (F&B Supervisor na Gianni’s Group).
Na final di e anochi tur invitado ta haya e oportunidad amplio pa por intercambia pensamento y ideanan durante un “networking reception”, cu ta inclui snacks, open bar y entretenimento musical.
E evento lo cuminsa desde 7.00 pm di anochi hunto cu un welcome drink y un aperitivo. Registracion ta cuminsa desde 5:45 pm na e pier patras di Renaissance Convention Center. Alabes, tur invitado por probecha di un photoshoot riba e isla, banda di beach, cu lo tuma lugar solamente entre 6 pm y 7 pm. E dress code ta ‘Beach Elegance’. Pa mas informacion tocante e dress code por consulta nos website www.arubachamber.comy pagina di FB.
Keynote speakers: Crescenzia Biemans y Maarten Naaijkens
Crescenzia ta e Chief Corporate Officer (CCO) di Bucuti & Tara Beach Resort, Managing Director di Tara Eco Supplies, y Secretaris di Stimami Sterilisami Foundation. Actualmente e ta miembro di directiva di e Environmental Committee di Aruba Hotel and Tourism Association (AHATA) y ta un Trustee di Caribbean Alliance for Sustainable Tourism como parti di e Caribbean Hotel and Tourism Association (CHTA).
Como Managing Director di Codam, un instituto pionero den educacion tecnologico innovativo y inclusivo, Maarten ta trece mas di 20 aña di experiencia den stimula crecemento tanto den sector B2B como B2C.
Maarten ta un ehecutivo cu hopi experiencia, conoci pa su habilidad comproba di desaroya y implementa strategianan cu tin un impacto significante, cu a yuda den lansamento exitoso di servicionan digital nobo, y un aumento grandi di entrada. Durante su carera, e la sobresali den forma ekiponan cu ta funciona na nivel halto, promoviendo un cultura di innovacion, y superando e retonan den e mundo di negoshi.
Maarten a fungi den pasado como Managing Director na Squla, como Group Marketing Director na DPG Media Hulanda, y como Senior Manager di E-Commerce na Sara Lee / Douwe Egberts Coffee.
Maarten tin experiencia extenso den diferente industria y lo duna perspectivanan valioso riba e topico, concentrando riba innovacion y liderazgo.
KvK ta gradici e patrocinadornan principal di e evento cu ta Caribbean Mercantile Bank N.V. y Elite Productions & Entertainment, y e colaboradornan: Guardian Group, Setar N.V., Qredits, Flexo Manpower Services, POV Productions y Renaissance Wind Creek Aruba Resort pa haci e evento aki posibel.
Tickets pa e evento ta disponibel via eventbrite BUY TICKETS y na oficina di KvK pa $125 pa persona Tambe por haci un transferencia di banco indicando Aruba Chamber Business Island Event 2024 y manda e comprobante di pago na secretariat@arubachamber.com. Pa mas informacion di e evento por tuma contacto cu e departamento di BIS na telefon 582-1566 ext. 330/335/342 of via e-mail: businessinfo@arubachamber.com.
Comunidad empresarial y pueblo di Aruba ta keda cordialmente invita pa asisti na e evento special aki. Aruba Chamber Business Island Event 2024 lo tuma luga na Renaissance Island, diahuebs 24 di oktober 2024, di 7:00 pm te cu 11:30 pm.
Aruba, 18 di oktober 2024
Camara di Comercio y Industria (KvK)
Events
Make an appointment
