Kamer van Koophandel en Nijverheid Aruba | Chamber of Commerce and Industry Aruba

011-2024 – KvK ta anuncia un forma mas economico di haci pago online: Por haci pago riba nos website cu debit card di CMB y Banco di Caribe

Oranjestad – Camara di Comercio y Industria Aruba (KvK) ta contento pa anuncia cu desde 30 di juli 2024 KvK ta ofrece un forma di pago adicional pa haci pago di e contribucion anual y compra di productonan via nos website. Awor ta posibel pa paga online riba nos website cu cuenta coriente di Caribbean Mercantile Bank (CMB) y Banco di Caribe usando e sistema di SENTOO. Cu esaki KvK ta demostra un esfuerso pa reduci gastonan pa e sector comercial y mehora e eficiencia di su servicio pa comunidad empresarial di Aruba.

Paga online cu cuenta coriente bancario di CMB of Banco di Caribe
KvK ta ofrece desde algun aña caba e posibilidad pa cumpra diferente productonan manera uittreksel, copia di acta di incorporacion (‘statuten/oprichtingsakte’), lista di companianan registra, etc. riba nos website www.arubachamber.com. Alabes, por haci e pago di e contribucion anual (‘jaarlijkse bijdrage’), via e cuenta di MyChamber. Cu e implementacion di SENTOO, e cliente lo por paga online pa e productonan menciona, e contribucion anual y cumpra credito pa consulta e Registro Comercial online.

E cambio aki ta un paso mas pa KvK mehora su infrastructura digital y pa facilita e experiencia di su clientenan. Aceptando e forma di pago adicional aki, ta un paso den nos compromiso pa mantene nos servicio moderno y eficiente y alabes evita gastonan innecesario di transaccion.

Manera ta custumber, na balie di KvK, e cliente por paga cu debit card di tur banco local, credit card y placa en efectivo.

Con esaki ta funciona?
SENTOO ta haci uzo di e mobile banking app of plataforma bancario online di e cliente su banco (CMB of Banco di Caribe). Cu e sistema di SENTOO, e banco di e cliente lo debita e suma for di e cuenta bancario di e cliente automaticamente, cu autorizacion di e cliente. Tur detaye di pago, manera e informacion di e persona cu lo ricibi e pago, e suma, y e descripcion di e pago, ta wordo yena automaticamente.

Fabor di sigui e pasonan aki:

• Subi riba comy click riba My Chamber. Of por subi riba e URL my.arubachamber.com
• Fabor di yena bo e-mail adres y password corespondiente.
• Siguientemente ta click riba “Handelsregister bekijken/ View Trade Registry”.
• Busca y scoge e compania cu ta desea di cumpra productonan di dje.
• Click riba e producto cu ta desea di cumpra.
• Click riba “Pay”.
• Scoge pa SENTOO. E Sistema lo hibabo na e Plataforma online di bo banco.
• Log in y sigui instruccionnan.

Pa mas informacion tocante e facilidad nobo di pago cu debit card, of otro servicio cu nos ta ofrece, por tuma contacto cu KvK na e-mail: support@arubachamber.com of info@arubachamber.com of na tel.: 582-1566.

Aruba, 9  di augustus 2024
Camara di Comercio y Industria (KvK)

Scroll To Top