010-2024 – MISION COMERCIAL ARUBA – SURINAM EXITOSO
Oranjestad – Dianan 24 te cu 28 di juni 2024, Camara di Comercio y Industria Aruba (KvK) riba iniciativa di Minister di Economia, Comunicacion y Desaroyo Sostenibel, den colaboracion cu Departamento di Asunto Economico, Comercio y Industria (DEZHI) y Aruba Trade & Industry Association (ATIA), a organisa un mision comercial pa Surinam. E mision a consisti di un delegacion comercial caminda 15 comerciante, representando 13 compania di Aruba, a bishita Paramaribo, cu e fin pa conoce y crea oportunidadnan di negoshi cu empresarionan di Surinam. Un cantidad grandi di empresarionan di Surinam a reuni durante matchmaking cu e delegacion comercial di Aruba. E delegacion comercial tabatin casi 100 cita cu comerciantenan di Surinam y a keda hopi satisfecho cu e citanan ricibi.
Mision comercial
E delegacion comercial tabata consisti di varios empresario ofreciendo producto y/of servicio den diferente ramo e.o.: ingenieria, productonan alimenticio, siga, importacion di productonan di agricultura, distribuidor di aparatonan medico y ICT. E citanan cu e empresarionan na Surinam a wordo organisa pa Vereniging Surinaams Bedrijfsleven (VSB). VSB a wordo funda riba 28 di maart 1950 cu e meta pa promove e bienestar economico y social di e comunidad y alabes ta un di e organisacion di dunadonan di trabao mas grandi na Surinam. Durante e mision, Ernst & Young na Surinam a duna un presentacion amplio di con pa haci negoshi cu Surinam pa asina informa y miho prepara e comerciantenan di Aruba pa nan citanan cu empresarionan di Surinam.
Programa
E programa di e delegacion comercial a cuminsa oficialmente diamars, 25 juni 2024. E delegacion a wordo ricibi door di e team di VSB. E programa a cuminsa cu presentacion interesante di con pa hasi negoshi cu Surinam, unda nan a ricibi presentacion riba diferente topico manera informacion general di e economia na Surinam, oportunidadnan empresarial, datos di exportacion di Surinam, informacion di e sistema legal y fiscal, y riba e aspectonan cultural di Surinam cu un comerciante mester tene cuenta cune ora di haci negoshi. Despues di e sesion interesante aki, e programa a sigui cu e prome citanan. E prome dia di e mision a conclui cu un networking event, organisa pa Minister di Economia, Comunicacion y Desaroyo Sostenibel, sr. Geoffrey Wever.
Na e mesun momento, Presidente di KvK, sr. Kemmerling, hunto cu Minister Wever, y Director di ATIA, sr. Henriquez, a reuni cu Minister di Economia, Empresarial y Inovacion di Surinam, Sra. Rishma Kuldipsingh, pa explora e posiblidadnan di cooperacion riba tereno di economia entre Aruba y Surinam cu e fin pa stimula mas actividad comercial entre e dos paisnan. Despues a reuni cu Presidente di Surinam, sr. Chandrikapersad Santokhi. Durante e reunion aki a combersa di diferente topiconan, e.o. riba e posibilidad di agrega un vuelo di carga entre Aruba y Surinam.
E siguiente dia e empresarionan di Aruba tabata tin mas cu 50 cita cu e empresarionan di Surinam. Tur empresario a haya e oportunidad di sinta cu companianan di Surinam, unda durante e sessionnan, ambos a haya oportunidad pa cera conoci cu otro. Durante e reunionnan aki, diferente palabracion pa futuro cooperacion a inicia. Anochi a brinda e delegacion un oportunidad pa experiencia cuminda local di Surinam na unda e delegacion por a gosa di un dushi cena.
Alabes, diaranson mainta, Presidente di KvK, sr. Kemmerling conhuntamente cu Minister Wever y Director di ATIA, sr. Henriquez, a reuni cu dos compania di logistica cu a duna splicacion di e tarifanan y tambe con por consolida diferente productonan den un container. Siguientemente, Presidente di KvK conhuntamente cu e delegacion di Aruba a bishita e port di Surinam y a reuni cu e Minister di Transporte, Communicacion y Turismo, sr. Uraiqit Ramsaran, responsabel pa e Port di Surinam.
Diahuebs mainta a cuminsa di biaha cu mas reunion di matchmaking cu empresarionan di Surinam. Un compania prominente di Aruba, a logra firma cu Gobierno di Surinam, un contracto pa asina exporta un producto medico pa tur hospital na Surinam. Esaki ta un logro grandi pa e compania, despues di hopi aña di negociacion. KvK ta felicita e compania cu e logro grandi aki.
E mision comercial a culmina cu un networking event organisa pa e Embahador di Reino Hulandes na Surinam, sr. Walter Oosterbos, na su residencia. Sr. Oosterbos a yama tur comerciante bon bini y a recorda tur e comerciantenan di Aruba cu e ta representa Aruba tambe, mirando cu e ta Embahador di Reino Hulandes. E delegacion comercial a forma parti di e network event aki hunto cu diferente stakeholders di Surinam.
Finalmente, sr. Kemmerling a duna e Embahador di Reino Hulandes na Surinam, den nomber di KvK, un pintura di Aruba ariba canvas, como gesto pa su amabilidad y hospitalidad na nos comerciantenan durante nan bishita na su residencia.
Gradicimento
KvK kier a gradici VSB, Minister Geoffrey Wever, Departamento di Asuntonan Economico y ATIA pa e colaboracion cu a haci e mision comercial aki uno sumamente exitoso. Tambe un danki na tur e comerciantenan di Aruba cu a participa na e mision aki y a haci e mision uno sumamente exitoso!
KvK ta sumamente contento cu e resultado di e mision, y ta sigi contribui na busca oportunidadnan pa empresario local y aporta na e promocion di nos isla como un destino empresarial. Por wak portret di e mision ariba nos facebook page: www.facebook.com/arubachamber.
Aruba, 5 di juli 2024
Camara di Comercio y Industria (KvK)
Events
Make an appointment
