Kamer van Koophandel en Nijverheid Aruba | Chamber of Commerce and Industry Aruba

01-2024 KvK ta anuncia directiva pa aña 2024: A ELIGI PRESIDENTE Y VICE-PRESIDENTE NOBO DI DIRECTIVA DI KvK

Oranjestad – Conforme e stipulacion den ley, Camara di Comercio y Industria (KvK) ta representa comercio y industria di Aruba. E directiva di KvK, cu ta consisti di 9 miembro, ta wordo eligi door di representantenan di negoshinan grandi “grootbedrijf” como tambe di negoshinan chikito “kleinbedrijf”. Den e prome reunion di directiva di KvK, e miembronan ta eligi un presidente y un vice-presidente pa e aña actual. Alabes ta keda determina cual miembro lo fungi como e presidente suplente. E presidente y vice-presidente, hunto cu e secretario/director ehecutivo, ta forma e directiva diario di KvK.

Pa aña 2024, e miembronan di directiva a eligi unanimamente sr. Diederik Kemmerling como presidente y sr. Robert Croes como vice-presidente. Sr. Kemmerling ta un comerciante den e ramo di marketing y ta residencia na Aruba pa mas di 12 aña. Alabes e ta miembro di e directiva di KvK ya pa tres aña. Sr. Robert Croes ta un comerciante cu ta activo den diferente sector y ta miembro di directiva di KvK desde aña 2023. Demas miembronan di directiva KvK ta sra. Monica Kock, sr. Gavril Mansur, sr. Eugene Farro, sr. Derrell Maxwell y sr. Omar Tromp cu lo fungi tambe como presidente suplente den caso cu e presidente of e vice-presidente ta ausente. Miembronan nobo ta sr. Devaney (Dave) Martinus y sra. Nathalie Moore.

KvK a tuma despedida di sra. Lay Hing de Kort-Yee y sra. Wanda Broeksema.

E directiva di KvK ta encarga cu e maneho y strategia di e organisacion, cu asistencia di e secretario/director ehecutivo, sr. Martijn Balkestein, kende alabes hunto cu e personal di KvK ta percura pa e funcionamento y actividadnan diario di KvK.

Nos team cu tin comercio na pecho
E directiva ta consisti di empresarionan cu tin Aruba y e sectornan comercial na pecho y cu den nomber di sector priva ta traha duro pa mantene bon comunicacion cu sector publico. Directiva di KvK ta dispuesto pa sigui duna su aporte y lo keda boga pa tin mas dialogo entre gobierno y e sector priva pa asina conhuntamente por atende e diferente puntonan di atencion y di preocupacion di e sector comercial. KvK lo percura pa ta mas activo e aña aki y lo organisa diferente actividadnan pa ricibi feedback di nos empresarionan y tambe pa KvK por comparti informacion y experticio.

Aruba, 10 di januari 2024
Camara di Comercio y Industria (KvK)
 
 

Scroll To Top