Kamer van Koophandel en Nijverheid Aruba | Chamber of Commerce and Industry Aruba

01-2019 – KvK ta anuncia directiva 2019: A elegi Presidente y Vice-Presidente nobo Directiva di KvK

Oranjestad – Awe 9 di januari 2019 a tene e prome re di directiva di Camara di Comercio y Industria di Aruba (KvK). Un di e puntonan importante di agenda pa e re aki tabata eligi un presidente y vice-presidente di e directiva pa aña 2019.

Representacion den directiva
E directiva di KvK ta consisti di miembronan cu ta representa negoshinan cu ta forma parti di grootbedrijf y kleinbedrijf. E miembronan di directiva a elegi unanimamente Sr. Kawish Misier como presidente y Sr. Satish Daryanani como vice-presidente di e directiva pa aña 2019. E directiva ta conta tambe cu un miembro nobo den persona di Sra. Monica Kock. Demas miembronan ta: Sra. Wanda Broeksema, Sra. Alexlindy Croes, Sr. August Croes, Sr. Randall Croes y Sr. Lionel de Cuba. E presidente y vice-presidente, hunto cu e secretario/director ehecutivo, Sra. Sonja J. Velthuizen, ta forma e directiva diario di Camara di Comercio. Sr. Omar Tromp lo fungi como presidente suplente den caso cu presidente o vice-presidente ta ausente. E directiva di KvK ta encarga cu e maneho y strategia di e organisacion y e secretario/director ehecutivo, huntu cu e personal di KvK, ta percura pa e funcionamento y actividadnan diario di KvK.

Un team dinamico
E directiva di KvK ta hopi entusiasma y KvK ta premira cu hopi retonan existente lo haya nan debido atencion. E board ta consisti di empresarionan cu tin Aruba y e sectornan comercial na pecho y cu den nomber di sector priva ta traha duro pa mantene bon comunicacion cu sector publico. E funcion di un miembro di directiva ta basa riba e deseo pa traha na bienestar di comunidad di Aruba. E ta un trabou boluntario di e empresario cu ta duna extra di su tempo banda di su propio negoshi pa yuda hiba Aruba completo dilanti.

Directiva di KvK ta cla y dispuesto pa yuda tur cliente y miembronan di KvK y tin oido pa tur sector comercial. KvK lo continua cu su metanan y lo sigui traha duro y conseha gobierno di Aruba pa comercio di Aruba sigui crece y duna di su experiencia y sigui stimula ideanan inovativo.

Aruba, 9 januari 2019
Camara di Comercio y Industria (KvK)

Scroll To Top