39-2018 – KvK a tene un re cu representantenan di Nacional Uni

Oranjestad – SDG Aruba tin algun tempo caba ta traha riba e formalisacion di e obhetivonan di desaroyonan sostenibel, e asina yama “SDGs” (Sustainable Development Goals).
Pa yuda brinda mas informacion na sector priva a organisa dia 14 di november ultimo un presentacion caminda a splica mas over e SDGs y tambe kico e oportunidadnan cu e SDGs por trece cune pa e comerciante y sector priva.

Pa e presentacion aki KvK a invita varios representante di sector priva pa nan ta presente pa siña mas encuanto e SDGs. E presentacion a tuma luga den e auditorio di KvK na J.E. Irausquin Boulevard 10. Sra. Sonja Velthuizen, director ehecutivo di KvK a bisa bon bini na tur presente y en particular e invitadonan special di Nacionnan Uni. Siguientemente sr. Magdy Martinez-Soliman, Representante Residente di Nacionnan Uni a hiba algun palabra y asina inspira e sector priva riba posibilidadnan cu SDGs ta brinda. Sr. Martinez-Soliman a pasa palabra pa Sr. Arno Boersma di Center of Excellence kende a duna un presentacion riba kico e rol di Nacionnan Uni ta encuanto e SDGs y con nan por contribui na Aruba su SDGs. Finalmente sra. Jocelyne Croes di comision di SDG a dirigi algun palabra y conta un tiki di kico Aruba ta bezig cune encuanto SDGs. Y finalmente a sigui un sesion di Q&A cu sr. Martinez-Soliman, sr. Boersma y sra. Croes.
E evento tabata bon bishita y esnan presente a mustra hopi interes den e SDGs. Publico presente a haci varios pregunta encuanto e topico di dia. Nan preocupacion principal pa e ehecucion di puntonan cu ta relaciona cu e SDGs ta e ‘red tape’ cu e sector priva ta wordo obstaculisa cune.

E Representante Residente di Nacionnan Uni pa e paisnan di cua Aruba ta forma parti ta Sr. Magdy Martinez-Soliman. Sr. Martinez-Soliman hunto cu e diputado Representante Residente Sra. Sharifa Ali-Abdullah a bishita Aruba desde 14 pa 16 di november y parti di nan bishita ta pa duna un presentacion encuanto con SDGs por crea oportunidadnan comercial nobo den un esfera di practicanan sostenibel comercial.

E “Sustainability Agenda 2030” y e SDGs di Nacionnan Uni a wordo crea na september 2015 a bira e standard global pa haci negoshi. Esaki 193 pais rond mundo a confirma y di acuerdo cune. Loke Nacionnan Uni kier logra cu e SDGs ta cu e lo contribui na trece un fin na e confusion cu ta reina encuanto kico ta sostenibel y trece cune un manera uniforma pa midi e nivel di sostenibilidad. Tin hopi oportunidad pa negoshinan grandi y chikito den e espacio di sostenibilidad cu no a wordo explora ainda na Aruba. Pa mas informacion encuanto SDGs por bishita http://sdgaruba.com of busca riba Facebook: SDG Aruba. KvK ta contento cu e acogida y e participacion. Mirando e interes KvK lo sigui organisa mas evento pa asina por sigui elabora riba e SDG pa Aruba.

Aruba, 19 november 2018
Camara di Comercio y Industria (KvK)