27-2018 – Business Plaza – Get Started! di KvK un biaha mas bon bishita

Oranjestad – Diasabra ultimo 30 di juni Camara di Comercio y Industria Aruba (KvK) a organisa un biaha mas e evento pa tur hende cu kier of cu recien a cuminsa un negoshi: Business Plaza – Get Started! E bishitante a haya e oportunidad pa expande nan conocemento riba diferente topico cu ta importante na e momento cu bo tin e ambicion di cuminsa un negoshi of ta den e proceso y tin pregunta specifico riba rekisitonan y maneho di bo negoshi. For di 9’or di mainta e bishitantenan por a atende diferente presentacion cu topiconan hopi interesante. KvK kier gradici Digicel cu tabata e main sponsor di e event Business Plaza – Get Started!

Sr. Ernst Mohamed, Presidente di KvK a dirigi su mes na esnan presente cu un discurso di bon bini. Siguientemente sra. Emelie Peterson di Digicel Aruba splica over e servicionan di Digicel y con ta facilita e comerciante. Sr. Frits Israel di Doc Opleiding a duna un interesante presentacion riba servicio na e consumidor cu algun conseho. Sr. Oliver Vieira hunto cu sra. Geraldine Bardouille
di Qredits a splica riba financiamento via Qredits. Sra. Tatiana Britten-Dubero di KvK a elabora riba servicionan di Business Information & Support di KvK y sra. Naline Heilbron a conta di su experiencia como empresario nobo. Despues di un pauze cortico sra. Michelle Wever y sr. Daniel Rasmijn di HBN Law a duna un presentacion encuanto areglonan di empleo. Por ultimo sra. Marilyn Wout y su coleganan di Departamento di Aduana a duna splicacion encuanto proceduranan di Douane cu algun conseho practico.

Durante eventonan di Business Plaza, KvK ta brinda e oportunidad pa tur bishitante haya un consulta di biaha. Diferente bishitante a haci uso di e oportunidad aki pa asina haci un consulta liber serca e Business Advisors di KvK y tambe por a registra nan negoshi. Sra. Sonja Velthuizen, Directora di KvK y sr. Dave Martinus di ActionCoach a duna informacion di e programa interesante pa e proximo curso di Empresario Independiente Chikito/Mediano. Departamento di Asunto Economico tambe tabata presenta pa brinda informacion na publico encuanto permisonan.

Durante pauze a brinda e oportunidad pa tur esnan presente intercambia ideanan y elabora riba topiconan pa fortifica lasonan comercial den un setting ameno combina cu bebida y aperitivos.

E biaha aki a ofrece 2 workshop durante e evento. Den e sala chikito sra. Henna Thode di HFT Treasury and Accounting Services N.V. a trata e topico guia financiero y administrativo y den e auditorio sr. Diederik Kemmerling di The Lab a toca e tema tacticanan di social media pa negoshinan chikito.

Proximo edicion di Business Plaza lo tuma luga januari 2019 y ta e edicion ‘Step Forward!’ dedica na empresarionan existente cu kier expande nan negoshi. Pa mas informacion tocante Business Plaza, curso Empresario Independiente Chikito/Mediano y otro servicio di KvK, por tuma contacto na 582-1566, ext. 42/35/27/30 of manda un e-mail pa: businessinfo@arubachamber.com.

Aruba, 3 di juli 2018
Camara di Comercio y Industria (KvK)