16-2021 – E vacuna ta e instrumento pa acelera recuperacion di nos economia, Part II

Oranjestad – Na varios ocasion, Camara di Comercio y Industria Aruba (KvK) a vocifera e importancia di recuperacion economico pa nos pais, caminda cu ta esencial pa comercio por sigui lora y brinda servicio pa mantene confiansa tanto bao di nos hendenan local como tambe e turistanan. Banda di esey, KvK a expresa su sosten pa vacunacion ya cu KvK ta sigui considera e vacuna como un instrumento pa acelera recuperacion di nos economia y turismo.

En bista di e situacion actual cu e casonan positivo di Covid a aumenta drasticamente debi na e variante Delta, ta primordial pa bolbe tuma e pasonan necesario. KvK ta bolbe haci un apelacion na un y tur, specialmente sector priva, pa sigui sostene y promove vacunacion. Mas tanto ciudadano wordo vacuna, mas lo reduci e riesgo di contagio y lo crea mas oportunidad pa aumento di actividad comercial, benta y ingreso, locual ta fundamental y den beneficio di henter nos comunidad ya cu consecuentemente lo reduci incertidumbre y trece stabilidad bek den nos economia y mercado laboral.

E pandemia ainda ta presente y ta keda pone un peso enorme mundialmente, tanto financiero como social y emocional, pues e scenario di aumento di vacunacion, banda di e reglanan di higiena y uzo di tapaboca ta aspectonan importante cu mester keda tin atencion di un y tur teniendo cuenta cu nos “normal nobo”.

Un isla vacuna y un comunidad conciente ta crea mas siguridad pa nos mes y pa turistanan y bishitantenan sigui bin Aruba y sinti nan mes sigur y confortabel.

Ciudadanonan (desde 12 aña) cu ainda no a vacuna por registra pa vacuna of por probecha y acudi na e proximo Vacunathon cu lo tuma luga riba diadumingo, 22 di augustus 2021 na Ritz Carlton di 9.00 am pa 4.00 pm.

Aruba, 20 di augustus 2021

Camara di Comercio y Industria (KvK)

Scroll To Top

Events

    Upcoming Events

    There are no upcoming events at this time.

    Make an appointment

Sitemap | Privacy Policy | Disclaimer | By orbitalnets