16-2018 – Lo instala e siguiente obranan di arte di studiantenan di Stichting Mira

Oranjestad – Camara di Comercio y Industria di Aruba (KvK) a inaugura su di 5 edicion di exposicion di arte na November di 2017. E exposicion a presenta un variedad hopi varia di creatividad di diferente di e artistanan studiante di Stichting Mira. E hobennan aki cu a cuminsa pinta na un edad hopi jong a sa di trece nan expresionnan artístico dilanti den un forma hopi profesional. Awo e segundo parti lo wordo exponi pa publico desde 20 di april proximo.

E directora di Stichting Mira, sra. Jean Vieira cu ta un docente di arte di profesion ya pa hopi aña, tin hopi experiencia den e area di arte creativo y terapeutico pa tur edad. Stichting Mira ta un fundacion pa e educacion artistico y e aprecio di arte. E fundacion a wordo estableci door di sra. Jean Vieira riba 6 di october 2006 y ta duna les na e muchanan di Aruba desde 2007. Muchanan por cuminsa sigui les ya caba cu un edad di 4 aña. Tambe tin les pa adulto y hende di edad mas avansa. Tur studiante ta ricibi guia enfoca riba diferente proyectonan di arte.

Mirando cu tin hopi diferente arte bunita, KvK ta duna oportunidad na tur e studiantenan pa mustra kico nan por ofrece y desde 20 di april un segundo grupo lo embeyese e halnan di KvK. E segundo parti lo goza di un “Expo Night” di 5:00 PM pa 7:00 PM na piso abou di KvK cu bebida y aperitivos. Obranan cu ta wordo exponi ta di Thomas Brown, Daenah Beke, Ariel Cunha, Atheena Diaz, Daniela van Esch, Azia Farrera, Sophy Figaroa, Kira Jeffree, Kanzis Keith, Isabel Lew Yen Tai, Isabella Manrique, Dwayne Matos, Yolaisha Ridderstap, Sofia Rivas, Camilla Samuels, Aleeza Semeleer, Rylan Semeleer, Tyron Thielman, Patricia van Trikt, y Athena Varde.

KvK ta gradici sra. Vieira y Stichting Mira pa acepta e invitacion y exhibi nan obra di arte den nos edificio y ta invita un y tur pa pasa bishita e apertura diabierna awor y tambe pasa libremente durante orario di oficina, di dialuna pa diabierna, entre 8:00 AM y 4:30 PM pa admira e diferente obranan di e studiantenan artista di Stichting Mira. Esnan interesa pa haya mas informacion tocante e posibilidad pa expone nan obra na KvK por manda un e-mail pa: businessinfo@arubachamber.com of yama na
582-1566 ext. 30.

Aruba, 16 di april 2018
Camara di Comercio y Industria (KvK)

Scroll To Top

Events

    Make an appointment

Sitemap | Privacy Policy | Disclaimer | By orbitalnets