15-2021 – En conexion cu e recuperacion di nos economia: Ta hopi urgente pa stabilisa e produccion y distribucion di electricidad

Oranjestad – Camara di Comercio y Industria (KvK), como representante di e comunidad empresarial, ta lamenta cu un bes mas e sector comercial ta sufri un perdida di ingreso significante pa motibo di un blackout severo diasabra ultimo, cu a dura casi 12 ora. Particularmente den e situacion actual, na unda nos economia ta uno hopi fragil y sensativo pa shock externo cu por stroba e recuperacion, ta sumamente importante pa haci esfuerso pa brinda nos empresarionan e oportunidad di haci negoshi.

Tin varios indicacion cu economia di Aruba gradualmente a continua su caminda di recuperacion despues di e pandemia di COVID-19. E confiansa di negoshinan a mehora, e perspectiva di e consumidonan ta menos pesimista, y tin un bon recuperacion di turismo. Actualmente nos ta solamente 20% bou di e nivel di e cantidad di turistanan cu nos a ricibi den mesun luna, na aña 2019. Pero ta importante di realisa cu mayoria di negoshi no tin reserva mas pa absorba mas golpi y un blackout cu ta dura asina largo facilmente por causa comercio un perdida di ingreso di miyones di florin, mas ainda den un fin di siman cu un cantidad grandi di personanan local y turista a probecha pa sali y disfruta di nos isla.

Ta e responsabilidad di tanto Web como Elmar pa percura pa un bon suministro di electricidad riba nos isla. Por tin comprension pa fayonan tecnico, pero mester bin cu alternativanan pa evita blackouts total y aloca fondonan pa cubri perdida y dañonan sufri relaciona cu interupcion di coriente cu ta dura largo manera tabata e caso diasabra ultimo.

KvK ta pone enfasis riba e urgencia pa tuma e pasonan necesario pa protehe e continuidad di e proceso di genera y distribui electricidad. Expertonan di nos pais mester busca e mescla ideal di energia pa Aruba cu ta confiabel, accesibel y sostenibel.

Ta sumamente importante pa fortalece nos economia y pa por garantisa e stabilidad y siguridad economico y proteha e recuperacion di nos economia. KvK ta spera cu lo duna oido na su conseho y cu lo sigui tuma accion pa rebiba nos economia locual cu ta sumamente necesario.

Aruba, 6 di juli 2021

Camara di Comercio y Industria (KvK)

Scroll To Top

Events

    Upcoming Events

    There are no upcoming events at this time.

    Make an appointment

Sitemap | Privacy Policy | Disclaimer | By orbitalnets