Connect to Us LinkedIn Youtube RSS

29-2016 - Aruba Chamber Business Event 2016: CTRL-ALT-DELETE
  • PDF
  • Print
  • Email
Oranjestad – Nos por corda cu ta un aña pasa cu Camara di Comercio y Industria Aruba (KvK) a tene su exitoso evento anual combina cu su celebracion di 85 aña di existencia. Aruba Chamber Business Event 2016 ta priminti di lo bira un biaha mas un evento grandi, caminda e importancia, desaroyonan y aspectonan vulnerabel di Cyber Security lo wordo presenta. E evento ta alabes un bon oportunidad pa crea y fortalece e lasonan cu otro comerciante presente den un atmosfera ameno y bon acompaña cu diferente aperitivo, bebida y bon entretenimiento musical di Buleria. 
 
Aruba Chamber Business Event 2016 lo tuma luga 20 di oktober 2016 y tin como titulo: 
“Ctrl-Alt-Delete: Challenge today’s Cyber Security thinking” y ta enfoca riba con pa evita atakenan cibernetico den sistema di bo negoshi. Patrocinado di e evento ta Caribbean Mercantile Bank.
 
E enfasis riba Cyber Security ta importante pa KvK mirando cu e-business ta birando cada dia di mas importancia pa comercio local. KvK ta den proceso di implementa un sistema di registro moderno y e proteccion di e informacion di e cliente ta esencial. Esaki ta inclui tambe e aspecto di pago online cu ta forma parti di un plataforma di e-business proteha contra hackers y posibel fraude.
 
Programa
E programa di e anochi aki lo consisti di un discurso di presidente di KvK, cu lo elabora riba e situacion economico di nos pais y e orador invita lo dedica su presentacion ariba e tema di e evento cu ta inclui un demostracion di hacking. Despues di e parti oficial, participantenan ta haya e oportunidad amplio pa por intercambia pensamento y ideanan durante un ‘networking reception’. Esaki lo tuma luga den un ambiente ameno unda cu naturalmente lo ofrece ‘hors d’oeuvres’ y premium drinks. E anochi grandioso aki no por tuma luga sin un parti festivo, pues como clausura di e anochi lo ofrece entretenimiento musical presenta pa Buleria.
 
Keynote speaker
Pa e anochi aki KvK lo conta cu un orador renombra den e mundo di Cyber Security, e señor hulandes Rickey Gevers. Rickey Gevers ta Chief Intelligence Officer den e departamento Computer & Network Security di e compania hulandes RedSocks. Den pasado e la traha como un ethical hacker y a yuda den diferente casonan di crimen cibernetico internacional. Mr. Gevers tin hopi experiencia como un cyber crime expert y ta un hacker profesional. Na aña 2005 durante cu e ta un studiante, Mr. Gevers a hack den un server di University of Michigan caminda cu FBI a informa autoridadnan hulandes pa asina aresta Mr. Gevers pa e acto aki. Pa esaki e la haya un sentencia y a bai cera pa 3 siman den prison na hulanda. Esaki a forma tambe e base di su carera como cyber crime expert.
 
Workshop
KvK ta presenta hunto cu e Business Event un workshop caminda cu Mr. Rickey Gevers lo cubri diferente topico relata cu cyber security. E workshop lo tuma luga diabierna 21 di oktober den e auditorium di KvK di 10:00 am pa 2:00 pm. No perde e workshop aki caminda lo examina e mundo di Cyber Security, debilidadnan y obstaculonan cu un compania por encontra cune y con pa e datos di e compania por keda proteha di atakenan di hackers. Lo duna tips cu por yuda esnan menos tecnico y tambe un guia pa por tin esaki den control. Esaki tambe lo ta un oportunidad pa haci pregunta na Mr. Gevers y trece dilanti bo preocupacionan y haña contesta con pa proteha bo compania y su datos.
 
Camara di Comercio ta gradici e sponsor di evento, Caribbean Mercantile Bank pa haci e evento anual posibel. Comunidad empresarial ta keda cordialmente invita pa asisti na e evento special aki. 
Aruba Chamber Business Event 2016 “CYBER SECURITY” lo tuma luga na Marriott Grand Ballroom, diahuebs 20 di oktober 2016, di 7:00 pm te cu 11:30 pm. Dress code ta ‘Business Elegant’.
 
Registracion y tickets 
Tickets pa e Business Event 2016 ta disponibel na KvK pa $100,- pa persona. Ticket pa e workshop ta $300,- y ta inclui un lunch. Package deal pa e Business Event y Workshop ta $325,-. Haci bo reservacion prome cu 18 di oktober ya cu cantidad ta limita. 
 
Esnan interesa den e evento dia 20 di oktober por tuma contacto cu e departamento di Secretariado na telefon 582-1120 ext. 29/41 pa haci reservacion. Registracion pa e workshop dia 21 di oktober ta via departamento di BIS via 582-1566 ext. 27/30/35/42 of via e-mail: This e-mail address is being protected from spambots. You need JavaScript enabled to view it .  
 
 
Aruba, 13 di oktober 2016
Camara di Comercio y Industria (KvK)
 
 

By orbitalnets.com