Connect to Us LinkedIn Youtube RSS

18-2016 - Business Plaza-Get Started! Diasabra 2 di juli
  • PDF
  • Print
  • Email
Oranjestad – Manera ya ta conoci, na luna di juli Camara di Comercio y Industria Aruba (KvK) ta organisa su evento anual, Business Plaza-Get Started!, dedica especialmente na tur hende cu kier cuminsa nan negoshi of cu a habri uno recientemente. Esaki ta tuma luga diasabra, 2 di juli 2016 na KvK, cuminsando for di 9’or di mainta te cu 3’or di atardi. 
 
Companianan cu ta yuda KvK realisa e Business Plaza-Get Started! ta Orbitalnets, Manrique Capriles, y Carmen Snacks.
 
Business Plaza ta ofrece e informacion completo pa e empresario nobo ‘Get Started’, di business idea te realisacion di e negoshi y guia pa por maneha e negoshi nobo. Un servicio extra cu KvK ta ofrece den e edicion aki ta e posibilidad pa registra un eenmanszaak of ‘partnership’ (VOF) riba dia di e evento. Pa esaki ta importante pa trece tur documento corecto y completo. Pa mas informacion tocante e documentonan rekeri tuma contacto cu KvK. 
 
Programa 
Registracion ta cuminsa ya pa 8:30 di mainta. E programa mes ta start 9’or, unda e presidente di KvK, Sra. Daphne Agius Cesareo – Lejuez, lo yama tur hende bon bini y conta di e importancia pa ta bon informa na momento di cuminsa cu bo negoshi. KvK ta keda busca diferente forma pa comparti tur tipo di informacion y guia pa tur empresario cu tin e necesidad na mas informacion. Di e forma aki KvK ta contribui na duna e empresario nobo mas oportunidad di exito. E programa parti mainta ta como lo siguiente:
 
Apertura door di presidente di KvK
Experencia di un empresario Sra. Daphne Agius Cesareo – Lejuez
Sra. Diana Helder-Lerma - DShop
Con pa cuminsa un negoshi
Pronostico di benta 
Caribconnect (plataforma digital)
Curso Empresario Independiente Chikito/Mediano 2016-2017 Sue-Ellen de Freitas Sousa – Aruba Chamber
Sr. Herbert Diaz -  SQS Company
Sra. Alexia Semeleer – Aruba Chamber
Sra. Sonja Velthuizen – Aruba Chamber y Sr. Dave Martinus – ActionCOACH
 
Networking
Di 12or pa 1or lo tin un break y networking session. Aki un y tur por probecha e momento pa netwerk cu demas participantenan y tambe oradornan presente. Manera ta custumber, KvK ta ofrece  snacks y bebida gratis durante henter dia. 
 
Workshops
Di 1or pa 2or di atardi lo tin un workshop “Set up your administration”, cual lo wordo duna door di Sr. Jose Arends, Shanee Management. E segundo workshop ta sigui di 2or pa 3or di atardi y ta trata ‘How to write a business plan’, duna pa sra. Lay Hing de Kort, Cornerstone Economics.  
 
Curso Empresario Independente 2016-2017
Desde 12 or tambe lo tuma consulta individual tocante e curso intensivo di KvK “Empresario Independente”. Sra. Sonja Velthuizen di KvK, lo ta disponibel pa duna cada persona interesa splicacion amplio di tur loke e curso ta encera y e rekisito di participacion. Esnan interesa por registra di biaha. 
 
Sr. Dave Martinus tambe lo ta disponibel pa duna mas informacion tocante e posibilidadnan di business coaching cu ta wordo ofreci durante e curso aki. 
 
Manera tur Business Plaza, tur bishitante cu ta desea, por ricibi un consulta priva cu un consehero di KvK,  Dept. di Asunto Economico y tambe Free Zone Aruba. E consultanan ta disponibel gratuitamente, di 10r di mainta te cu 3or di atardi. 
 
Por ultimo, KvK kier yama danki na cada un di nos sponsors: Orbitalnets, Manrique Capriles y Carmen Snacks pa nan aporte ofreci.
 
Probecha di e evento aki pa siña y haya mas informacion con pa start bo negoshi. Realisa bo soño di tin bo propio negoshi. Pa mas informacion y registracion like nos facebook page Facebook.com/arubachamber. Registracion ta obligatorio pa tur presentacion y workshop. Registracion ta posibel pa medio di nos website, http://www.kvk.aw/signup/. Pa mas informacion por tuma contacto tambe via e-mail: This e-mail address is being protected from spambots. You need JavaScript enabled to view it of yama nos na: 582-1566, ext 35/27/30.  
 
 
Aruba, 23 di juni, 2016
Camara di Comercio y Industria (KvK)
 
 

By orbitalnets.com