Connect to Us LinkedIn Youtube RSS

16-2016 - Curso Empresario Independiente Chikito/Mediano 2015-2016 a yega su fin
  • PDF
  • Print
  • Email
Oranjestad – E curso Empresario Independiente Chikito/Mediano 2015-2016, cu a inicia na October aña pasa, a marca e di dos sesion pa loke ta trata e curiculo diseña pa Camara di Comercio y Industria Aruba (KvK) special pa e empresa chikito/mediano (SMEs). 
 
Despues di 6 luna intensivo di les semanal e curso aki a finalisa exitosamente. Consistiendo di un cantidad amplio di topico manera marketing, legislacion, finanzas y administracion, impuesto, recurso humano y varios otro aspecto di negoshi, e curso sigur ta amplia conocemento di e participante. 
E intencion ta, como parti di KvK su tareanan, pa informa y educa e (futuro) empresario pa ta miho prepara na momento di establece y maneha su negoshi. 
Pa e participantenan e periodo di curso no tabata algo facil pero un periodo extenso cu a rekeri hopi dedicacion y trabou duro pa por pasa nan examen cu exito. Algun persona tin un negoshi caba y otro tin nan trabou diario pues e estudio y preparacion pa cada les den oranan liber sigur ta un sacrificio. 
 
Un total di 14 participante (di 20) a logra termina e examen cu exito y a ricibi nan certificado pa esaki. 
Entrega di certificado a tuma luga diamars, 14 di juni 2016 na KvK, sigui pa un celebracion ameno cu familiar y amistades. Entrega a ser haci pa Director Ehecutivo di KvK Sra. Sonja Velthuizen kende a hiba palabra di elogio na cada participante pa e esfuerzo y logro pa e curso. Tambe a hiba palabra Sr. Dave Martinus, un di e docentenan di e curso y kende tambe ta encarga cu e parti di ‘coaching’ cu ta ser ofreci na cada cursista como parti di e pakete. Na final di e ceremonia di entrega cursistanan a ricibi un sorpresa ameno, unda cu Sr. Bert Vermaas di VCC International a anuncia cu su compania ta ofrece e software Payroll Pro completamente gratis na e cursista cu inscribi su negoshi na KvK dentro di 3 luna. Esaki sigur a cai na agrado di un y tur y algun cursista ya a indica di lo probecha di e tremendo oferta aki.    
 
E certificado cu participantenan a ricibi despues di a gradua pa nan examen ta comparabel cu e ‘middenstands-diploma’ na Hulanda. E ta uno di gran balor tanto pa e persona como pa su negoshi y cu lo ser registra tambe na Camara di Comercio na momento cu e negoshi wordo inscribi.
 
Palabranan di gratitud ta bai na tur esnan cu a coopera na realisa e curso aki, Dave Martinus, Leo Maduro, Patrick Melchiors, Bruce Harms, Ryan Maduro, Guido Picus, Bert Vermaas, Dick Rikkengaa, Herbert Diaz, Frank Snijders y e team di WTS, Goswino Oduber, Boy Ecury, Roberto Lejuez y Olivier de Jong. 
 
Despues di dos edicion exitoso di curso Empresario Independiente Chikito/Mediano, KvK ta cla pa cuminsa prepara pa e tercer curso. E proceso pa esaki lo inicia dentro di poco pa cual esnan interesa por cuminsa inscribi. Manera custumber, e periodo di curso number tres lo ta di October 2016 pa April 2017. 
 
KvK ta spera di por sigui brinda e apoyo y educacion necesario pa un y tur cu kier cuminsa cu su empresa por ta bon prepara pa esaki. 
Tur esnan cu kier participa den e siguiente curso, of haya mas informacion por tuma contacto cu Sra. Sue-Ellen Farro-de Freitas Sousa na This e-mail address is being protected from spambots. You need JavaScript enabled to view it .
 
 
Camara di Comercio y Industria Aruba (KvK)
15 di juni 2016
 
   
 

By orbitalnets.com