Connect to Us LinkedIn Youtube RSS

49-2015 - Camara di Comercio su tercer edicion di exposicion di arte
  • PDF
  • Print
  • Email
Oranjestad – Diabierna 6 di November 2015, Camara di Comercio y Industria Aruba (KvK) a tene su tercer exposicion di arte. Cu e meta pa duna un aporte na arte local, e exposicion aki ta reemplasa e exposicion “Etnia Nativa” di sr. Anthony Croes cu a keda exponi durante un aña na KvK. 
 
Como artista local e aña aki a toca turno na sr. Reginald de Palm cu a presenta su obra hibando e tema “Un mundo di diferente color’. Sr. de Palm ta splica cu su tema ta refleha e mundo cu nos ta pertenece na dje, mientras tanto cu nos tur ta diferente den color, cultura, interes y varios otro aspecto cu ta haci nos diferente na otro. Den su obra por mira tambe arte cu ta relata na e mundo artistico, musical, na e naturalesa local y arte cu ta refleha un mundo di fantasia. Cada interaccion por keda identifica cu un color y e acumulacion di colornan ta ilustra un identidad unda nos cada un ta reconoce nos mundo. 
 
Reginald de Palm a nace na Aruba y a biba tambe na Corsou y Boneiro. Na un edad hoben ya el a cuminsa pinta y a keda fascina cu e hecho cu bo por crea dimension artificial riba un pida papel. Similar na otro artistanan local, un toke di Aruba semper ta presente den su obra. Reginald a participa y pinta diferente obra pa eventonan manera entre otro, Caribbean Sea Jazz Festival, unda cu el a gana e ‘People’s Choice Award’ na aña 2010. Tambe e tabata tin e honor pa entrega un di su obranan na Su Mahestad Reina Maxima durante e ‘Status Aparte Expo’ na aña 2011.
 
E apertura di ‘un mundo di diferente color’ a conta cu presencia di varios empresario y interesadonan cu a bin pa admira e arte cu por cierto lo keda exponi pa un aña largo na Camara di Comercio. Esaki a tuma lugar diabierna atardi na e area di recepcion di KvK den un ambiente ameno y bishitantenan a disfruta di snacks y bebida cu tabata disponibel.
 
Camara di Comercio ta gradici sr. de Palm pa exhibi su obra di arte den nos edificio y ta invita un y tur pa pasa libremente durante oranan di oficina, di dialuna pa diabierna, entre 8.00 y 4.30 pm pa wak e pinturanan. Alavez KvK ta gradici tur cu a bishita e apertura di e expo. 
 
Esnan interesa pa haya mas informacion tocante e posibilidad pa exhibi na KvK por manda un e-mail pa: This e-mail address is being protected from spambots. You need JavaScript enabled to view it .  
 
 
Aruba, 6 di november 2015
Camara di Comercio y Industria (KvK)
 
          
 

By orbitalnets.com