Connect to Us LinkedIn Youtube RSS

48-2015 - Camara di Comercio a reuni cu Minister di Husticia
  • PDF
  • Print
  • Email
Oranjestad – Dialuna, 2 di november ultimo Camara di Comercio y Industria (KvK) a reuni cu Minister di Husticia, mr. drs. Arthur L. Dowers.  KvK a pidi e reunion debi na e preocupacion cu ta reina entre comerciantenan riba e tema di siguridad. Esaki mas aun considerando e ultimo desaroyonan pa locual ta trata e bishitantenan ambulante procedente di Venezuela, cu lamentablemente ta creando un impresion general di insiguridad. 
 
Durante di e reunion KvK a trece e diferente preocupacionnan di e comerciantenan bao atencion di Minister pa Minister por duna su punto di bista y por elabora un poco riba kico su departamentonan ta haciendo pa cu e tema di siguridad. 
 
Security agent
Mas y mas comerciante ta wak e necesidad pa contrata un “security agent” pa por protehe nan empleadonan y propiedad. Sinembargo e sentido di inseguridad ta keda presente ya cu no ta permiti un “security agent” cana arma. 
For di e punto di bista di Minister un “security agent” toch tin un autoridad basta amplio.Ta asina cu sigun ley ora un persona comete un acto castigabel cualkier cuidadano por detene e persona aki y entrege na e autoridad concerni. Pero ora ta trata di un acto peligroso, unda tin personanan arma, no ta consehabel ni tampoco ta spera pa ningun hende actua contra di e personanan aki. En bista cu e peligro ta hopi grandi ta preferibel pa laga polis mes atende esaki. Ademas polis mes no ta usa nan arma sin mas, ma solamente den casonan sumamente peligroso y/o extremo. Pesey Minister ta di opinion cu si duna un “security agent” e autorisacion pa usa arma, manera ta e caso den algun pais, esaki lo ta mas bien un riesgo grandi cu por ta peligroso tanto pa e “security agent” mes, como tambe pa otro personanan y  cu ta miho pa evita esaki pa preveni cualkier eventualidad. E uzo di “pepperspray” door di un “security agent”, na unda e resultado lo ta menos grave, lo por ta un opcion, pero lo mester delibera mas tocante esaki. 
 
Grupo di chat    
Ultimo tempo, conhuntamente cu diferente gremionan y gruponan di interes, a introduci un grupo di chat via social media. Den caso cu tin algun inkietud of ta sinti insiguridad por manda menshae y/o tips via e chatgroup y en bista cu recherche y otro autoridadnan ta forma parti di grupo aki, e autoridadnan concerni por reacciona mas lihe riba e casonan concerni. 
 
Vigilancia di camera 
Minister a elabora cu tin un grupo special di polis cu ta atende cu e proyecto di vigilancia di camera. Di punta pa punta di Aruba (di Lighthouse te cu Baby Beach) a instala mas o menos 2000 camara na luganan strategico. Na e momento aki ta trahando riba e instalacion di coriente y coneccion di internet. E uzo di e camaranan ta pa por yuda soluciona casonan hudicial y no ta e intencion pa e camaranan tin bista riba y/o ta den cura di residencianan. A instala algun camara caba den Caya Grandi y den e area di hotel. Minister a caba di ricibi e concepto di ley y despues esaki lo wordo entrega nan Staten. Ora e ley wordo aproba y drenta na vigor, Minister lo elabora mas riba esaki y tambe lo duna varios sesion informativo pa cu e funcion di e camaranan. 
 
Ley di Identificacion Obligatorio
Den pasado tabatin e ley di identificacion obligatorio, unda cu un opstoringsambtenaar (polis) por a para un persona y pidie pa e mustra su identificacion. Minister a splica cu e ley aki a wordo elimina paso tin hopi turista di diferente pais cu ta bishita Aruba y cu por ta discriminatorio (“profiling”) pa controla un persona si y otro no y/o haci distinccion entre turista y habitantenan di nos pais. No obstante, durante un  inspeccion preventivo si ta permiti pa e funcionario concerni puntra e persona cu ta wordo controla pa un identificacion. Tambe den cierto caso por hasta opta pa aplica e ley di vreemdelingenwet. Actualmente ta trahando riba un landsverordening cu lo regla un ke otro pa areanan cu tin risico (p.e. centro di ciudad cu tin adictonan ambulante ta circula) y e.o. lo permiti pa haci control y eventualmente retira personanan cu ta causa problema for di e areanan aki.
Tambe Minister a enfatisa cu ta tumando accion fuerte contra dunadonan di trabao cu ta emplea trahadonan ilegal y ta impone un multa cu por suma te cu AWG. 100.000,- pa caso.
 
Criminalidad bao Hubentud
Minister a splica cu ta alarmante cu e edad di e hobennan cu ta comete criminalidad ta bahando. Ta trata di muchanan di apenas 11 pa 12 aña cu ya caba ta horta. Na e momento aki tin diferente proyecto pendiente pa trata e problematica aki, pero no tin e recurso financiero pa por inicia e proyectonan. Minister ta haci un apelacion pa eventualmente por duna un contribucion – financiero o den otro forma – pa asina por sigui cu e proyectonan aki. A base di proyectonan cu si a wordo ehecuta por a nota un cambio considerabel den a actitud di e hobennan. Si tin interes pa yuda, por tuma contacto cu Ministerio di Husticia.
 
 
Aruba, 4 di november 2015
Camara di Comercio y Industria (KvK)
      
 

By orbitalnets.com