Connect to Us LinkedIn Youtube RSS

42-2015 - KvK: Ultimo desaroyonan den centro di cuidad y vecindario a crea cierto preocupacion bao di e comerciantenan (Part I)
  • PDF
  • Print
  • Email
Oranjestad, 29 di september 2015 – Camara di  Comercio y Industria (KvK) recientemente a tene un anochi informativo, den cual directiva di KvK a invita empresarionan di centro di cuidad y vecindario pa duna feedback encuanto e ultimo desaroyonan den centro di ciudad y e efecto di esaki pa e negoshinan den e areanan concerni. Varios preocupacion a bin dilanti, incluyendo e introduccion di parkeermeters y e tram, como tambe e incertidumbre encuanto posibel cambionan den e regimen fiscal (belasting) y KvK lo elabora riba e diferente puntonan individualmente den un secuencia di comunicado di prensa.
 
Pa locual ta trata e punto di parkeermeters a base di e feedback ricibi por conclui cu e concepto di parkeermeters no ta wordo considera uno negativo, pero mas bien ta haya cu e proceso di implementacion a trece hopi confusion y por a cana miho. Por a opta p.e. di cubri e area gradualmente y di limita e area na solamente e centro di ciudad en bes di a extende e area te pafo di e centro. Alaves KvK por a compronde cu segun e plan presenta originalmente na e comerciantenan e parkeermeters lo a wordo introduci conhuntamente cu parkeergarages pa asina por brinda e espacio necesario pa e.o empleado y laga espacio di parkeermeters pa cliente.
 
Mayoria di comerciante presente a indica di a experencia un reduccion drastico den nan benta y ta sinti cu e timing pa e introduccion di parkeermeters no ta oportuno ya cu ta conoci cu e cierre di Caya Grandi a causa un cambio den e custumber di shop y cu a bira mas comodo pa shop den e otro areanan pafo di centro di ciudad. Desde e re-apertura di Caya Grandi e comerciantenan ta trahando duru pa atrae clientenan bek pa shop den Caya Grandi pero e parkeermeters a crea un otro barrera siendo cu e situacion ya caba tabata dificil teniendo cuenta cu e desaroyonan na Venezuela y cu actualmente ta low season pa turismo. 
E tarifa di parkeer ta wordo considera halto, aunke cu a adapta esaki pa Afl. 2 pa 1 hora y mey y Afl 60 pa luna pa e vaknan geel. Otro punto di atencion ta cu a limita pago na placa cash (florin) y no tin opcion pa debolbe placa ni paga cu dollars ni tampoco paga cu debit of credit card. Comerciantenan ta sinti cu mester por tin mas flexibilidad y opcion pa por parkeer pa un termino mas cortico (p.e. 15 minuut) y pa reduci e horario di paga pa parkeer y exclui Diasabra y Diadomingo. 
 
E comerciantenan tambe a expresa nan inkietud pa locual ta trata seguridad en general, tanto pa e clientenan como pa e comerciantenan, mas aun si un persona parkeer leu for di e sitio unda cu e ta bay. Alaves e clientenan ta preocupa y no ta haci compras trankilamente mas ya cu nan ta keda pendiente y ta pura pa bay buska nan auto bek prome cu nan tempo di parkeer caduca y pa preveni cu pone klem riba nan vehiculo. 
 
Pesey KvK ta sigui boga pa mas dialogo y ta spera cu por tin un evaluacion a corto plazo y a base di e feedback ricibi for di tur esnan directamente involvi pa asina por mantene e aspectonan cu ta funciona bon y por mehora unda cu ta necesario. Ta confia tambe cu tur proceso, e.o. di aplicacionnan y permisonan rekeri, wordo finalisa mas pronto posibel. 
E pensamento tras di e parkeermeters semper tabata pa revitalisa comercio den centro di ciudad y ta logico cu si e situacion actual ta perhudicando comercio lo mester por reconsidera y adapta e proyecto aki. 
 
Camara di Comercio y Industria semper ta dispuesto pa yuda den e proceso aki.
 
 
Aruba, 29 di september 2015
Camara di Comercio y Industria (KvK)

  

 
 

By orbitalnets.com