Connect to Us LinkedIn Youtube RSS

18-2011 - Mision Economico di Panama bishitando Aruba
  • PDF
  • Print
  • Email

Oranjestad – Dia 25 y 26 di augustus un Mision Economico procedente di Panama lo ta di bishita na Aruba. E mision economico lo ser efectua pa Camara di Comercio y Industria Aruba (KvK) cu cooperacion di Minister di Economia, Asuntonan Social y Cultura, señora Hooyboer-Winklaar, Departemento di Asunto Economico y Ministerio de Comercios e Industrias di Panama (MICI) representa na Aruba pa e consul di Panama señora Anabel Arends Mojica. Meta di e mision ta pa estrecha y fortifica e lasonan comercial entre ambos pais.

Panama cu su posicion geografico privilegia ta wordo considera pais di enfoke pa loke ta trata relacionnan comercial internacional di nos pais. Den e ultimo añanan a mira un aumento di interes y di resultadonan concreto pa cu comercio entre Aruba y Panama cu a hasi cu na aña 2010 Panama tabata e di tres pais di importacion pa Aruba despues di Merca y Hulanda, cu un balor di importacion di Afl. 58.265.000 segun cifranan di CBS. Panama ta conoci pa exportacion di fruta y berdura di calidad halto. Esaki ta trece oportunidadnan interesante pa e comerciante local y como consecuencia, un oferta mas interesante pa e consumidor.

Un grupo di empresario Panameno lo bishita Aruba durante dos dia pa investiga oportunidad pa haci negoshi cu nos isla. Ministerio de Comercios e Industrias di Panama (MICI) ta encarga cu e parti organisatorio na Panama y lo compaña e empresarionan pa Aruba. E coordinacion local ta na encargo di KvK cu ta percura pa tanto e agenda di citanan cu empresanan local como tambe presentacionnan informativo pa e grupo di empresario Panameño. KvK ta conta riba un participacion di mas o menos diez empresa di Panama di tanto sector agropecuario como carga. A ricibi confirmacion di participacion di diferente compania di fruta y berdura y di productonan manera seafood, diferente tipo di keeshi etc. cu lo participa na e mision aki.

Vice-Ministro de Comercio Exterior señor Jose Domingo Arias a caba di confirma cu e lo acompaña e grupo durante nan bishita na Aruba. Departamento di Asunto Exterior lo percura pa un programa adecua pa e dignatario aki.

Esaki ta e prome biaha cu un mision economico di Panama lo bishita Aruba. E bishita di e grupo di comerciantenan Panameño ta e resultado di un mision comercial exitoso cu a tuma lugar aña pasa unda KvK Aruba a bishita Panama hunto cu empresarionan di Aruba manera entre otro Free Zone Aruba NV, Aruba Bank, Romar Trading, Paperworks etc acompaña pa Minister Hooyboer-Winklaar y representantenan di Departamento di Asuntonan Economico y e follow up exitoso haci na nivel gubernamental. KvK ta sigur cu e mision aki lo ofrece oportunidadnan atractivo pa e comerciante local y ta invita tur empresario interesa pa tuma contacto cu nos via number di telefon 582.1566 ext. 27/35/42 pa mas informacion of na This e-mail address is being protected from spambots. You need JavaScript enabled to view it .


Aruba, 18 augustus 2011
Camara di Comercio y Industria (KvK)

 

By orbitalnets.com