Connect to Us LinkedIn Youtube RSS

40-2015 - Ultimo desaroyo di Camara di Comercio
  • PDF
  • Print
  • Email
Oranjestad, 13 di augustus 2015 – Nos a drenta e segundo mita di 2015, y Camara di Comercio y Industria Aruba (KvK) tin un agenda yen pa e lunanan cu ta bin y ta desea di comunica por medio di e relato aki e ultimo desaroyo di nos organisacion.
 
Recientemente KvK a despedi di Sr. Leo Maduro como secretario di e institucion. Sr. Maduro merecidamente ta bay disfruta di su pensioen despues di 10 aña den servicio di KvK. Sr. Maduro a inicia su carera na KvK como beleidsmedewerker y e ultimo 4 aña, Sr. Maduro a fungi como secretario di KvK. Sra. Sonja Velthuizen, kende ta hoofd di Business Information & Support a keda nombra como secretario suplente.
 
Den KvK su hunta di directiva tambe tin algun cambio. Despues di 10 aña como miembro di directiva, Sr. Robert Carrasquero a tuma su retiro y na su luga Sr. Serge Mansur a join e directiva di KvK na Juni ultimo. E nombramento di Sr. Mansur a bay segun e reglamento di admision na e directiva di KvK. Sr Carrasquero tabata tambe vice-presidente di e hunta di directiva y na su luga Julisa Arends-Hoevertsz a wordo eligi como vice-presidente pa aña 2015.
 
Tur aña KvK ta tene eleccion parcial di directiva, segun un schedule fiho. Cada aña un parti di e directiva di KvK ta baha, segun un sistema rotativo unda cada bes tres di e nuebe puestonan ta bira vacante. Esaki ta duna oportunidad pa miembro nobo drenta pa contribui na trabao di KvK, pero di otro banda manteniendo continuidad den directiva. Riba 31 di december 2015 atrobe 3 miembro di e hunta di directiva lo baha pero conforme e stipulacionnan den Ordenanza di Eleccion di KvK ta permisibel pa miembro cu ta baha pone nan mes reeligibel. Den e lunanan cu ta bin KvK lo publica e fechanan cu candidatonan por postula nan mes pa un asiento den e hunta di directiva di KvK. 
 
E posicion como miembro di directiva di KvK ta encera un responsabilidad boluntario, cu a cambio ta duna un oportunidad di ta envolvi y di siña mas di cerca con nos economia ta desaroya y di e manera aki yuda KvK cumpli cu tur su tareanan conforme e necesidadnan y interes di e mundo empresarial.
 
85 aña di aniversario
Dia 8 di September venidero, KvK ta celebra su di 85 aniversario. Ariba e dia grandi aki, KvK lo celebra hunto cu su clientenan na nos oficina. Tur bishitante lo haya un regalo di aprecio. Despues nos lo celebra e aniversario aki durante KvK su anual business event, cu un topico hopi actual y un orador di renombre internacional. Pa e celebracion special aki KvK lo presenta un publicacion tocante e proceso di haci negoshi na Aruba. Mas informacion tocante nos celebracion lo wordo anuncia pronto, pa awo nota e fecha diahuebs, 1 di october 2015!
 
Exposicion di arte
October ta haci un aña cu nos exposicion actual, Etnia Nativa, di Sr. Anthony Croes ta habri pa publico den nos edificio. KvK ta invita tur esnan cu no a mira e exposicion bunita aki, pa bin admira e arte tipico Arubiano cu su influencia indjan prome cu 15 di October 2015, pasobra despues KvK lo presenta arte di un artista nobo.
 
Curso Empresario Independiente Chikito/Mediano
Dialuna 19 di october ta cuminsa e curso practico (similar na un ‘Middenstandsdiploma na Hulanda) cu ta specialmente diseña pa guia starters den e mundo di empresario. KvK a ricibi hopi aplicacion y e registracion a cera. Na e momentonan aki a inicia e proceso unda lo selecta e aplicantenan mas motiva pa por wordo admiti na e curso y KvK ta sigur cu e aña aki atrobe, lo tin un grupo di empresarionan entusiasma pa completa e curso cu exito.
 
Curso Administracion Financiero pa Principiante I y II
Un otro curso exitoso cu KvK a inicia e aña aki na april ta e curso Administracion Financiero pa Principiante. E prome parti di e curso aki ta wordo ripiti na november. Y mirando e animo y e exito cu tur e cursistanan tabatin, lo start na september e di dos parti, cu ta e continuacion ariba e prome curso, pa asina e cursistanan cu a completa e curso na mei por adkiri conocimento mas profundo den e materia complica aki. Interesadonan por aplica directamente na This e-mail address is being protected from spambots. You need JavaScript enabled to view it
 
 
Aruba, 13 di augustus, 2015
Camara di Comercio y Industria (KvK)
 
 
 

By orbitalnets.com