Connect to Us LinkedIn Youtube RSS

39-2015 - KvK: No tin necesidad pa introduci un Bank Transaction Tax
  • PDF
  • Print
  • Email
Oranjestad – Camara di Comercio y Industria Aruba (KvK) kier trece dilanti su puntonan di preocupacion tocante e Bank Transaction Tax. Ta trata di un impuesto nobo cu lo wordo cobra riba transaccionnan bancario, sea debit y/of credit. KvK ta compronde cu e meta di e impuesto aki ta pa financia proyectonan di infrastructura, entre otro e asina yama “Green Corridor”.
 
Ta asina cu impuestonan similar ta existi na otro pais den forma di Financial Transaction Tax (FTT), por ehempel na algun pais miembro di EU. Pero den e casonan ey (hustamente pa evita consecuencianan negativo riba e consumidor y e economia) e FTT no ta aplicabel riba actividad financiero diario di consumidor of negoshi, sino unicamente riba actividadnan hopi limita cu ta toca intercambio di instrumentonan financiero y contractonan derivativo entre otro.
 
KvK ta di acuerdo cu ta existi e necesidad pa inverti den mehoracion y ampliacion di e infrastructura di nos pais.  Pero na otro banda mehoracion di nos infrastructura nunca por bay a costo di e clima di inversion di nos pais y menos ainda e stabilidad financiero di nos gobierno.
 
Mescos cu tur instancia competente y independiente (manera IMF, World Bank, Fitch, Standards & Poor, etc.), KvK ta urgi nos gobernantenan pa trece su gastonan bou control ena luga di inventa cada bes mas impuesto pa cubri deficitnan cu no ta sostenibel. Tur e impuestonan aki ta duna e impresion di un maneho financiero Ad-hoc y ta crea instabilidad den nos clima di inversion, y consecuentemente insiguridad den potencial inversionista.  Riba esey e impuestonan ta haci Aruba mucho mas caro cu tur otro pais den nos region locual ta haci cu ta bira cada dia mas dificil pa atrae inversionista den cualkier industria cu no ta turismo. 
 
Haciendo e sistema bancario/financiero cu ta cay bou di supervision di Banco Central mas costoso, gobierno ta creando un incentivo directo pa persona y empresa haci mas uzo di transaccionnan en efectivo of haci transaccion den exterior. Esey lo tin como efecto cu ta mas dificil pa e instancianan gubernamental concerni tin un bista riba e fluho di placa den circulacion. Tambe un desaroyo asina lo tin efectonan negativo riba e propio banconan comercial local, y lo debilita nos cumplimento cu instancianan manera OECD y FATF.
 
Segun KvK ta compronde for di gobierno, e fondonan cu lo wordo recauda cu e impuesto nobo aki lo wordo maneha na un forma parecido na FDA, pues lo no cay bou di supervision di nos Parlamento. Esaki ta un modus operandi cu KvK tin hopi dificultad pa acepta como cu e bay linea recta contra di e principionan di un democracia y e derecho di e comunidad pa controla su gobierno pa medio di su representacion den Parlamento. 
 
KvK ta opina cu un maneho responsabel y huicioso di nos fondonan publico lo kita e necesidad pa inventa structuranan no-ordinario pa por financia proyectonan di infrastructura. E fondonan cu nos comunidad ta contribui na nos aparato publico ta mas cu suficiente pa por expande, mehora y mantene nos pais su infrastructura sin aumenta e peso di e aparato gubernamental riba nos comunidad.
 
Pa e motibonan aki, KvK no por bay di acuerdo cu e impuesto nobo aki, y ta bolbe urgi gobierno pa sinta y dialoga riba e.o. e tema aki pa hunto por yega na solucionnan mas beneficioso pa comunidad.
 
Manera semper KvK ta dispuesto pa dialoga y yuda contribui na cualkier forma pa yuda nos comunidad, nos comercio y nos pais haya solucionnan beneficioso pa e retonan cu nos ta confrontando.
 
 
Aruba, 4 di augustus 2015
Camara di Comercio y Industria (KvK)
 

By orbitalnets.com