Connect to Us LinkedIn Youtube RSS

34-2015 - KvK ta pidi mas claridad tocante BAZV y otro medidanan
  • PDF
  • Print
  • Email
Oranjestad – Camara di Comercio y Industria Aruba (KvK) por medio di e comunicado aki ta haci un peticion na gobierno pa trece mas claridad tocante e medidanan cu lo wordo introduci dentro di poco na Aruba. KvK ta di opinion cu tin poco informacion di parti gobierno alrespecto y cu no ta tene na cuenta e peso grandi cu mas medida ta bai trece den e comunidad comercial, cu tur e consecuencia pa nos comunidad en general.
 
Medidanan na caminda
Actualmente gobierno tin dos medida na caminda, cu ta e aumento di BAZV y introduccion di e bank transfer tax. Ademas tin varios proyecto di PPP cu ta wordo firma, cu a largo plaso ta debe cu nos pais tin cu carga. 
 
Reforma fiscal
Na Maart, KvK a sinta hunto cu e comision di belasting y Minister Bermudez tocante un reforma fiscal. Aki a informa KvK cu gobierno ta bai introduci na januari 2016 un Algemene Bestedingsbelasting (ABB) cu lo reemplasa e BBO, BAZV y elimina e invoerrechten. Alabes unabes introduci e ABB, no lo tin necesidad mas pa introduci un bank transfer tax. Pa sorpresa di tur hende apenas dos siman despues, a introduci e foreign exchange tax dia 1 di april 2015.
 
Mirando e forma con e introduccion di e foreign exchange tax a bai, y teniendo na cuenta cu e rumornan tocante e bank transfer tax no ta disaparece, KvK ta pidi gobierno pa duna mas claridad tocante e impuesto aki. Ki dia e ta wordo introduci y si gobierno ta tene na cuenta su consecuencianan. 
 
KvK di su parti ta hopi preocupa si dicidi pa introduci e bank transfer tax, pasobra den un solo golpi nos isla lo bira hopi mas caro cu e ta caba, pa tur hende. Sin lubida cu e bank transfer tax lo forsa hopi hende cuminsa paga atrobe cu placa en efectivo, posibelmente hibando nos economia back pa un cash economy. 
 
BAZV
E introduccion di BAZV a causa hopi confusion y iritacion. No solamente pasobra empresarionan tabatin solamente un paar di dia pa cambia nan point-of-sale systems y otro systema di facturacion y cobransa pero tabatin casi niun informacion disponibel di parti di gobierno pa e extra gasto cu e belasting nobo ta trece cu ne. Awe, e aumento di e BAZV atrobe ta un punto di discusion mirando cu kier introduci un tarifa nobo pa 7 di juli venidero, atrobe sin tene cuenta cu negoshinan mester tempo pa adapta nan systema. 
 
KvK ta pidi gobierno pa re-evalua nan plan, y hala e fecha pa uno mas laat, na cuminsamento di un otro luna pasobra no por introduci un tarifa di belasting nobo sin mas mey-mey di un luna.
Ademas di e forma aki ta duna e empresario un periodo inicial mas largo pa e por informa su mes mihor tocante e cambio den e BAZV y prima di AZV y asina implementa nan corectamente den su negoshi, evitando cu e ta cobra su cliente eroneamente y sin lubida, implementa su payroll na manera cu debe ser.
 
Un otro motibo importante pa hala e fecha pa uno mas laat, ta, mirando e hecho cu e BAZV a causa hopi confusion na momento di su introducion, importante pa reconsidera e BAZV den e forma cu e ta wordo ehecuta awor. KvK ta urgi gobierno pa simplifica e ley di BAZV (hunto cu e BBO) pa trece mas claridad y transparencia tocante e cobransa di e belasting aki.
 
Projectonan PPP
KvK ta notando cu tin varios acuerdo ta wordo sera cu tin di haber cu e proyectonan di PPP. Actualmente, Aruba no por haci mas debe pa financia proyectonan nobo sino solamente pa paga proyecto ya existente. KvK ta pidi gobierno pa duna mas informacion tocante e proyectonan cu ya ta un “done deal” y cua ta esnan cu ta na caminda. Ta importante pa tur hende sa cua proyectonan ta planea, y te con lew e palabracionnan y compromisonan pa cu e proyectonan aki ta. 
 
Impacto ariba prijs
E preocupacion di KvK cu tur e preguntanan haci den e comunicado aki ta grandi. Ta parce cu no ta tene na cuenta cu empresarionan no por carga e peso enorme di tur e diferente belasting y primanan mas. Pa no menciona mes cu cada rato enbes di reforma fiscal, nos regimen fiscal ta bira un poco mas complica. 
 
E medidanan aki ta keda haci nos isla mas caro y menos atractivo pa inversionista internacional. Como destino empresarial e gastonan ta demasiado halto compara cu e region, cual no ta na nos beneficio. Ya caba hopi hende y empresanan ta prefera di cumpra cosnan di exterior enbes di local pasobra e prijs local ta mucho halto, y pa algun caba fuera di alcance. Mas medida ta solamente tene nos economia den un circulo vicioso sin cu nos por sali pronto di dje.
 
Alabes, KvK ta cuestiona kico gobierno mes ta haciendo pa baha su propio gastonan, prome cu e impone medidanan nobo ariba nos empresanan y comunidad.  
 
 
Aruba, 3 di juli 2015
Camara di Comercio y Industria (KvK)
 

By orbitalnets.com