Connect to Us LinkedIn Youtube RSS

26-2015 - KvK: Registracion Jan - April casi identico cu 2014
  • PDF
  • Print
  • Email
Oranjestad  –   For di cifranan di Registro Comercial na Camara di Comercio y Industria  di Aruba (KvK) por conclui cu registracion di empresa den promer 4 luna di 2015 ta practicamente igual na e mesun periodo di 2014. Na 2015 a registra ‘onshore’ 420 empresa, y na 2014 419 empresa. E total pa ‘onshore’ y ‘offshore’ hunto ta igual na 420, ya cu na 2015 te awor no a registra ningun empresa offshore, y na 2014 a registra solamente 1 empresa den e mesun periodo.
 
 
Dentro di e diferente categoria di empresa si ta observa cierto cambio. Por ehemplo por nota cu e cantidad di NV a keda mengua: 91 na 2014 y e aña aki 71. E cantidad di VBA a keda aumenta: na 2014 esaki tabata 80 den e promer 4 luna, y awor pa e aña aki ta na 95 VBA registra. Na 2015 ainda no a registra ningun AVV y ta parce cu definitivamente ta yegando un fin na e era di AVV, cu ta netamente un forma legal pa offshore business. Den e mesun periodo di cuatro luna aki a registra un cancelacion di 42 AVV offshore cu no ta activo mas, cu cual aña tras aña e tipo di empresa aki ta birando menos y menos.
 
Otro indicador economico
Fuera di e cifranan di registracion no tin na e momento aki otro indicador disponibel di con economia ta move na e momento aki. Publicacionnan di Banco Central te awor no ta duna cifra tocante diferente forma di entrada di gobierno cu ta indicador importante di con economia ta bayendo, entre otro entrada di BBO/BAZV, impuesto di importacion y loonbelasting.
 
Cifra di turismo
Loke si ta disponibel ta e cifranan  di turismo den e promer tres luna di aña. Por conclui cu turismo ‘stayover’ a conoce un aumento fuerte den e promer tres luna di 2015, compara cu e mesun periodo di aña pasa. E cantidad di nochi pa bishitante a aumenta cu 12,2% te na 2.146.684 nochi di estadia total. Den e categoria di cantidad di bishitante por observa un crecemento di 20,1%. Di esakinan un gran parti, 76,3% ta bishitante venezolano. E cifranan aki ta indica cu tin mas persona ta yegando pa un estadia cortico, loke por tin su causa den e restriccionnan financiero cu gobierno di Venezuela a impone riba esnan cu ta biaha pa exterior. 
E average di estadia (cantidad di nochi pa cada bishitante) di e periodo aki na 2015 a cay di 7,8 nochi aña pasa te un promedio di 7,3 awor. Un indicacion cu e mayoria di turista venezolano ta keda menos tempo, y ta gasta menos tambe.  
Di otro banda, e aumento den mercado di Norte America tambe tabata considerable, principalmente di Estado Uni: di 7,3% pa e promer cuartal di aña 2015, compara cu 2014. E turistanan extra di mercado americano ta forma 22% di e total di e aumento di casi 50.000 turista mas den e periodo analisa. 
 
Turismo crucero a mustra un caida considerable den comparacion cu aña pasa. Den cantidad di pasahero e caida tabata di 19,9% y den cantidad di barco e disminucion tabata di 14,2%.
 
 
Aruba, 26 di mei 2015
Camara di Comercio y Industria (KvK)
 
 

By orbitalnets.com