Connect to Us LinkedIn Youtube RSS

25-2015 - KvK: Protocol di 2 mei tin varios consecuencia
  • PDF
  • Print
  • Email
Oranjestad  –   Recientemente gobierno di Aruba y di Hulanda a yega na un protocol riba maneho financiero. Despues cu a tende comentario di varios banda,  Camara di Comercio y Industria (KvK) ta duna su punto di bista riba algun aspecto di e acuerdo aki. E motibo pa emiti un opinion awor ta cu e acuerdo no ta un asunto momentaneo, sino cu e lo tin consecuencia inmediato y a largo plazo pa e forma di goberna nos pais.
E acuerdo aki ta trece definitivamente un supervision independiente riba e maneho financiero di gobernacion di Aruba. KvK ta di acuerdo, mirando e rumbo cu finanzas publico a tuma. Na varios ocasion KvK a adverti pa e situacion peligroso cu gobierno su finanzas ta aden. Cu e supervision aki ta yega atraves di un ley di Aruba mes, y no den forma di un medida di gobierno di Reino, ta bon noticia. Un medida di Reino lo a causa hopi mas turbulencia den comunidad pa finalmente yega na mesun punto, unda awor a base di cooperacion lo yega na un structura nobo di supervision. Un promer paso pa pone Aruba ‘back on track’, incluso acceso na prestamo internacional.
 
Incertidumbre pa comunidad y economia no a kita
E acuerdo firma ta bisa claramente cu e recomendacionnan, haci pa CFT na december 2014, mester keda “traduci den medida substancia debidamente, cu por ser implementa na tempo den e aña coriente”. E medidanan referi no ta aparece den e presupuesto aproba pa Parlamento, aunke a introduci via un amienda e medida extra di aumento di BAZV cu 1% (y reduccion di prima di AZV cu 1%). Esaki ta parce un prome intento pa cuminsa aumenta entrada di gobierno. Na opinion di KvK, despues di tur e experiencia cu Dialogo Social, ta di lamenta cu a tuma e medida aki ‘ad hoc’, sin consulta e partnernan social. Un regreso na mesa pa continua cu Dialogo Social asina a bira practicamente imposibel.
E demas recomendacion di CFT no implementa por keda  introduci den e lunanan venidero. Asina no a yega un fin ainda na e incertidumbre kico mas lo tin na medida. Di e manera aki comercio no tin un seguridad kico ta bay pasa y no por planea nan gastonan pa e aña coriente, y esaki no lo yuda stimula inversion. 
 
Regla pa bon gobernacion corporativo
Tambe e protocol ta contene un acuerdo riba introduccion di regla di bon gobernacion y transparencia di tur compania otro entidad legal liga na Pais Aruba. E reglanan nobo, cu mester ta conforme norma internacional riba e tereno aki, ta inclui: procedimento pa venta y adkisicion di accion den entidadnan cu ta persona legal; criterio pa maneho di pago di dividend di entidad den cual Aruba ta participa, y procedimento y exigencia pa cu nombramento y retiro di dirigente di entidad den cual Aruba ta  participa.
KvK ta aplaudi e acuerdo tambe pa loke ta e punto aki, ya cu pa hopi aña KvK ta boga pa mas transparencia den e entidadnan liga na gobernacion. Ta di spera cu esaki por desemboca tambe den un miho control riba e operacion di e empresa y entidadnan aki. 
 
Ta di spera cu gobierno lo tuma medida tambe den su propio cas pa frena su gastonan. Si no, lo bira dificil pa spera comprension di comunidad y di sector priva pa medida destina solamente na aumenta entrada. 
 
Aruba, 26 di mei 2015
Camara di Comercio y Industria (KvK)
 
 

By orbitalnets.com