Connect to Us LinkedIn Youtube RSS

15-2015 - Hopi interes pa Mision Comercial pa Cuba
  • PDF
  • Print
  • Email
Oranjestad, 6 di maart 2015  –  Mirando e ultimo desaroyonan na Cuba, Camara di Comercio y Industria Aruba (KvK) a dicidi cu Aruba tambe mester por explora y eventualmente probecha di e avancenan cu ta tumando lugar. Pesey, despues di a papia cu Embahada Hulandes y Camara di Comercio di Cuba, a dicidi awor ta e momento oportuno pa organisa un mision comercial pa Cuba. Diaranson ultimo KvK a tene un nochi di informacion, unda un sala yen a mustra hopi interes pa forma parti di e delegacion cu lo biaha pa Cuba.
 
E mision lo ta di 8-12 di juni 2015. Su meta ta pa sondea e posibilidadnan existente den comercio en general, pero cu enfoke especial riba turismo y servicio relaciona cu turismo, produccion agricola y produccion industrial. Tambe lo tin como obhetivo pa yega na un acuerdo di cooperacion entre Camara di Comercio di Cuba y KvK, cual lo ta e base pa continua e cooperacion comercial entre Cuba y Aruba den futuro.
 
E mision lo consisti di bishitanan oficial na Camara di Comecio di Cuba y embahada Hulandes na Cuba. Tambe lo tin un seminario con pa haci negoshi na Cuba, lo bishita compania y algun proyecto grandi realisa na Cuba, manera e puerto di Mariel. Tur participante por ta den e match making meetings cu empresanan di nan interes.
 
Varios empresario interesa den e mision a atende e nochi di informacion, unda nan a ricibi informacion valioso di Cuba, manera estadistica y economia, pero tambe tocante cultura y “the way of doing business”. 
 
Actualmente, Cuba tin hopi inversion extranhero, especialmente den turismo y den infrastructura moderno, unda e pais tin 7 airport internacional y un waf grandi moderno. Banda di tur inversion, Cuba ta keda un pais unda burocracia y e embargo di Merca ta keda haci Cuba un pais complica. Asina mes, Cuba ta hospeda 3 miyon di turista pa aña. Esaki ta mustra cu apesar di tur cos, tin avance grandi na Cuba. Esnan cu tin pasenshi, por realisa hopi oportunidad a largo plazo.
 
Merca ta re-estableciendo su relacion cu Cuba y e cambio lo bin di tur manera y pronto. Y esey kiermeen cu si empresarionan di Aruba kier probecha di oportunidadnan, awor ta e momento pa hacie. Pesey KvK ta haya importante pa bai Cuba cu un mision oficial, unda e meta principal ta pa haya mas informacion di kico e oportunidadnan pa e empresario di Aruba por ta. Un parti importante di haci negoshi na Cuba ta cu nan ta pone hopi enfasis ariba e aspecto personal, pues formando parti di e delegacion, lo habri mas porta pa e empresario Arubano.
 
Dia 1 di april proximo lo tin un siguiente nochi di informacion unda lo tin hopi mas detaye disponibel tocante e biahe. Deadline pa inscribi lo ta dia 15 di april, pa por caba di regla e programa cu Camara di Comercio Cubano. Cupo disponibel ta limita, asina ta importante pa registra na tempo. Formulario y condicion di registracion lo ta disponibel riba website di KvK pronto. Pa mas informacion riba e mision comercial aki por tuma contacto cu KvK, na 582.1566, ext. 26 of por bishita nos website www.arubachamber.com. Aki por mira e presentacion di diaranson cu tur informacion tocante e biahe pa Cuba.
 
 
Aruba, 6 di maart 2015
Camara di Comercio y Industria (KvK)
 
      
 

By orbitalnets.com