Connect to Us LinkedIn Youtube RSS

11-2015 - KvK: Mas transparencia riba futuro di tereno Valero
  • PDF
  • Print
  • Email
Oranjestad  – Camara di Comercio y Industria (KvK) a tuma nota di e ultimo sucesonan encuanto e futuro di e tereno di e refineria di Valero. Na promer lugar por bisa cu tabata di spera cu na cierto momento Valero y gobierno di Aruba lo a cuminsa negocia e traspaso di e propiedad grandi aki na Pais Aruba. E refineria ta yegando na e fin di e periodo di tres aña despues di e cierre, unda  Valero lo mester debolbe e propiedad limpi. Esaki significa cu no por tarda mucho mas cu inicio di e desmantelamiento di e refineria, si e periodo menciona pa entrega ta caba na november 2015. E opcion di haya un operador cu credibilidad y fondo suficiente pa renoba e propiedad no a logra den ultimo añanan, y por lo tanto no ta probable cu lo haya un candidato den e lunanan venidero.
 
Mas importante ta pa pone atencion awor riba loke por haci cu e tereno despues cu e refineria no tey mas. KvK den pasado recien a soporta hopi critica pa su posicion cu e refineria no tin futuro mas y cu mester cuminza pensa kico lo por bay haci na actividad economico na e sitio aki. Finalmente a yega na e punto cu di berdad mester hiba e discusion ey. 
 
Pa cuminsa mester contempla e actividadnan cu lo continua nan operacion. Esaki ta e area di transshipment di crudo parti pabao, y e parti di combustible cu ta yega na Valero pa consumo local (gasoline, diesel, jet fuel, heavy fuel oil y kerosine). Por pensa riba hinca esakinan den un compania local cu participacion di Pais Aruba y otro accionista local, di manera cu gobierno no mester carga tur e inversionnan su so.
 
Banda di esaki mester pensa riba redestinacion di e waf di San Nicolas, cu awor aki ta destina na ricibi producto petrolero, pero por haya otro tarea, entre otro creando un conexion cu lama pa e centro di San Nicolas, locual lo crea un ambiente nobo cu nunca San Nicolas tabatin. Combina cu revitalisacion di centro comercial di San Nicolas esaki por crea algo nobo, no den promer lugar pa turismo, sino pa mehora y enrikece San Nicolas pa e ciudadano di Aruba na promer lugar. 
 
Proximamente KvK lo cuminsa atrobe na duna conocimento di su pensamento riba desaroyo di e tereno di refineria y mas en general di henter San Nicolas. En general KvK ta di opinion cu mester elabora un masterplan integral pa San Nicolas, pa motibo cu ta henter San Nicolas mester un facelift. KvK ta di opinion cu un discusion abierto di e tema aki lo yuda trece ideanan dilanti, envez di mantene e silencio actual kico ta e perspectivanan pa futuro di e parti importante aki di Aruba.
 
Aruba, 17 di februari 2015
Camara di Comercio y Industria (KvK)
alt  alt
 

By orbitalnets.com