Connect to Us LinkedIn Youtube RSS

08-2015 - Tur NV, VBA y AVV: Deadline pa deposito di relato financiero
  • PDF
  • Print
  • Email
Oranjestad, 9 di februari 2015  – Camara di Comercio y Industria Aruba (KvK) kier a recorda tur NV, VBA y AVV ariba e obligacion pa deposita nan relato financiero anual 2013 na KvK. Esnan cu a pospone fecha di entrega y no a deposita ainda, lo tin percura pa haci esaki no mas tarda cu 27 di februari venidero.
 
Deposito di relato financiero
Desde 2012, tur NV, VBA y AVV a haya e obligacion di deposita nan relato financiero anual na KvK. E obligacion aki ta un di e exigencianan di FATF pa aumenta control y supervision ariba e companianan aki. Pa esnan cu e aña fiscal ta core di januari pa december, e deadline pa traha y aproba e jaarrekening ta dia 31 di augustus, tur aña.
 
Extension di periodo di aprobacion di cuenta anual
Den caso cu e directiva no alcansa pa deposita e relato financiero dentro di ocho luna despues cu e aña fiscal termina, e directiva mester pidi un periodo di prolongacion (uitstel) na su asamblea di accionista. E periodo di prolongacion ta maximo seis luna. Ora e compania su aña fiscal ta di januari te cu december, su deadline di uitstel pa deposita ta 28 di februari. Cual e aña aki ta ariba un diasabra, pues diabierna 27 di februari ta e fecha mas tarda pa deposita e relato financiero anual.
 
Mescos cu tur reunion di asamblea di accionista, e compania tin e obligacion pa notula e reunion den cual e decision a ser tuma pa prolongacion. E director(nan) tin cu warda e notulen na oficina di e compania.
 
Tuma nota cu no ta pidi e extension na KvK, sino na e accionista(nan). KvK ta e instancia designa pa warda e relato financiero di cada compania. KvK no ta e instancia cu ta ricibi peticion pa uitstel y KvK no ta e instancia cu ta otorga e uitstel tampoco.
Sin embargo KvK ta ripara ora cu e compania no entrega su jaarrekening. Pesey ta consehabel, den caso cu haci peticion pa uitstel na e asamblea di accionista, pa notifica KvK di e decision aki, por ehempel door di deposita copia di e notulen na KvK. E decision pa duna prolongacion por ser deposita na KvK, hunto cu formulario 16 y identificacion valido di un director.
 
Validez di e relato financiero
Tene cuenta cu pa e relato financiero tin validez, e mester tin firma di cada miembro di e directiva y cada miembro di e junta di comisario, si esaki ta aplicabel. E directiva ta firma e documento prome cu e accionistanan aproba e relato financiero durante un asamblea di accionista. Entrega na KvK mester sucede dentro di ocho dia cu e documento keda aproba.
 
Compania no activo
NV, VBA y AVV cu no ta operando un negoshi activamente, es decir nan ta “dormant”, tambe tin e obligacion pa deposita nan relato financiero. Ta te ora disolve e persona huridico mes e obligacion ta stop di existi.
 
Obligacion pa deposita registro di accionista
Ademas di e relato financiero anual, tur NV, VBA y AVV mester entrega tambe un copia di nan registro di accionista (aandeelhoudersregister) na KvK, dentro di 8 luna despues cu e aña fiscal termina. Tene cuenta cu pa e registro di accionista no tin posibilidad di uitstel!
E directiva di e compania ta rekeri pa mantene e registro up to date. Mester warda e registro na e adres di e compania of na e oficina di e representante legal. 
 
Procedura pa deposita relato financiero 2013 na KvK
Despues di aprobacion di e accionistanan, y firma pa e directiva y e junta di comisario, mester deposita e relato financiero 2013, hunto cu formulario 16 y ID di un director na KvK, no mas tarda cu 27 di februari 2015. 
E relato financiero y e registro di accionista no ta disponibel pa publico mira, a menos cu e compania ta aproba of desea esaki. Corda cu e relato financiero 2014 mester wordo deposita pa 31 augustus 2015.
Tur empresario cu tin cualkier duda of ta desea di sa mas tocante e proceso aki, por tuma contacto libremente cu KvK na 582-1566 ext. 26/42/30/22/21. Tambe por consulta nos website pa mas informacion,www.arubachamber.com/business-in-aruba/filing-of-the-annual-financial-statement.
 
 
Aruba, 9 di februari 2015
Camara di Comercio y Industria (KvK)
 
 

By orbitalnets.com