Connect to Us LinkedIn Youtube RSS

40-2014 - KvK: Perspectiva economico pa 2015
  • PDF
  • Print
  • Email
Oranjestad – Mientras cu pa 2014 no tin claridad ainda con nos economia a anda, crecimento economico den 2015 lo depende di e inversionnan cu lo ser haci, tanto den sector priva como den sector publico. Esaki ta depende tambe di e proyectonan grandi cu gobierno tin programa, pero cu tin tardanza grandi caba y lo inicia solamente si financiamento keda cla. Di otro banda e proyecto di hotel riba tereno di ex-Bushiri Hotel no lo continua y e inversion corespondiente lo no tey. Un pregunta grandi cu mester haya contesta den 2015 ta e futuro di e tereno di Valero y relaciona cu esaki di San Nicolas den su totalidad. Demolicion casi sigur di e refineria en todo caso lo significa  empleo pa un cierto cantidad di hende pa un periodo no defini ainda y ta di spera cu empresanan local lo haya prioridad den e oportunidad aki.
Banda di esaki, ta spera cu turismo lo continua cu un crecimento modera, siempre y cuando no sucede algun calamidad den exterior cu ta cambia ambiente internacional. Situacion na Venezuela ta keda un preocupacion den e sentido aki. E re-inicio di relacion diplomatico y comercial entre Estadonan Uni y Cuba lo por bay tin efecto riba turismo den Caribe, pero na e momento aki ta dificil pa predeci con esaki lo resulta pa turismo na Aruba.
 
Entre e preocupacionnan cu ta keda den aña 2015, ta figura e nivel abao di divisas cu ta drenta Aruba via exportacion di bienes y servicio (mayoritariamente via turismo). Esaki  ta relaciona cu e perdida di e refineria na 2012, cual tabata genera un suma considerabel di divisa. Aruba mester urgentemente gana mas divisa pa por mantene un balansa sano entre loke nos ta genera na divisa y loke nos ta importa na bienes y servicio. Incentivo pa actividad economico cu ta genera divisa lo mester bira un prioridad pa nos maneho economico.
 
Otro preocupacion ta e falta di claridad ainda kico ta bay sucede cu presupuesto 2015 di gobierno di Aruba. Di loke a keda publica te awor por comprende cu lo tin un corte bastante severo den presupuesto, entre otro den gasto di personal. Na inauguracion di Parlamento na september Gobernador interino a anuncia na nomber di gobierno cu lo tin un corte di 15% riba gasto di personal, como contribucion na e total di mas cu  Afl. 250 miyon cu lo ser corta compara cu e presupuesto 2015, si den esaki no tin cambio di maneho (“bij ongewijzigd beleid”). E medidanan di austeridad aki por tin consecuencia serio pa poder di compra di e ciudadano, y seguidamente pa sector priva.
 
Tambe lo mester bin claridad den e medidanan riba tereno di impuesto. Entre otro gobierno tin pensa di introduci e impuesto riba transaccion bancario, loke ta significa otro peso mas pa e empresario, cu finalmente por conduci na inflacion mas fuerte. Di otro banda, prijsnan internacional abao pa producto petrolero por trece prijs mas faborabel pa tur cos relaciona cu petroleo, entre otro transporte, prijs di awa y coriente, cual por contrarresta aumento di prijs pa otro causa. Probecha e actual prijs abao di crudo pa produccion di awa y coriente sinembargo ta depende di e hedging agreement cu tin, cual ta impedi compra inmediato na prijs actual abao riba mercado internacional.
 
Cu tur esaki, aña 2015 no lo bira un aña facil, pero di otro banda no ta necesario pa ta demasiado pesimista, en bista cu economia di Aruba tin su retonan, pero hopi ta depende di e claridad cu gobernacion mester duna ki rumbo nos ta tuma.
 
Aruba, 18 December 2014
Camara di Comercio y Industria (KvK)
 
 

By orbitalnets.com