Connect to Us LinkedIn Youtube RSS

39-2014 - KvK: Evaluacion di aña 2014
  • PDF
  • Print
  • Email
Oranjestad  – Haciendo un evaluacion di kico aña 2014 a trece pa Aruba, Camara di Comercio y Industria (KvK) ta constata cu 2014 tabata un aña cu señalnan mixto pa nos economia.  Di e cifranan disponibel te cu augustus, emiti pa Banco Central, por deduci cu BBO den e periodo menciona a mustra un crecimento leve di alrededor di 3,2% compara cu e aña anterior. Impuesto di importacion a cay cu 6,5%, compara cu e mesun periodo di aña 2013. Impuesto riba salario sinembargo a aumenta cu 14,3% den e periodo januari – augustus 2014. Parti di e aumento aki probablemente tin relacion cu retironan masal na cuminsamento di aña (Westin, p.e.).
 
Banda di esaki por menciona cu e Business Perception  Survey di Banco Central di november 2014 ta duna un perspectiva menos faborabel pa loke ta desaroyo di negoshi. Tur esaki, hunto cu e problemanan rond di presupuesto 2014 a ocasiona bastante incertidumbre pa sector priva, sin cu tin un bista cla kico e consecuencianan ta pa inversion  y rentabilidad den sector priva. Banco Central na november ainda ta mantene su pronostico di un crecimento di GDP nominal di 2,4% den su Economic Forecast Monitor.   
 
En todo caso por mira cu sector di turismo, a sigui desaroya den direccion faborabel pa loke ta e cantidad di turista. Mester tuma na cuenta si cu un parti grandi di e aumento a tuma luga den turismo for di Venezuela, loke ta keda cu su riesgonan mirando e situacion instabil na e pais aki. Tambe ta notabel cu e cantidad di placa cu e turista ta laga atras a mehora for di e situacion menos faborabel den añanan 2011 y 2012. Segun cifranan di CBS, na 2013 e average di placa gasta pa persona  (ADEX: Average Daily Expenditure)  a aumenta te US$ 90,32 mientras cu pa 2011 y 2012 esaki tabata bao US$ 90,-.  Di otro banda, ainda falta pa yega bek na e nivel di consumo pa persona cu na 2009 a alcansa nivel di US$ 102 pa dia. 
 
Registracion di empresa nobo
Na KvK a registra te cu fin di november 2014 un cantidad di 1200 empresa, loke por haci e total pa 2014 mas o menos 1300 empresa. Esaki lo ta un poco menos cu 2013, unda a registra 1347 empresa nobo. Mientras cu esaki ta un indicacion cu e animo pa lanta negoshi nobo tabata un poco menos cu e aña anterior, produccion total di balor agrega den economia lo depende mas bien di e resultado di e companianan estableci caba.
 
alt
 
En general por bisa cu aña 2014 ta termina cu un imagen mixto con e aña a bay, cu e posibilidad cu economia por a crece levemente, pero e cifranan pa comproba esey no ta disponibel ainda. E mirada ta fiha riba kico aña 2015 lo trece.
 
Aruba, 18 December 2014
Camara di Comercio y Industria (KvK)
 
 

By orbitalnets.com