Connect to Us LinkedIn Youtube RSS

34-2014 - Cera conoci cu docente di curso Empresario Independiente
  • PDF
  • Print
  • Email

Oranjestad, 31 di october 2014 - Manera ya ta conoci den e prome siman di october e curso Empresario Independiente Chikito/Mediano a inicia. Tanto e cursistanan como e docentenan ta sumamente entusiasma cu e diferente topiconan cu lo ser presenta durante e curso.

Ya desde anuncio di e curso e interes di comunidad empresarial pa participa tabata grandi. Consecuentemente e curso tabata ‘sold out’ dentro di algun dia y ya caba tin interesado cu a indica di lo participa na e curso di 2015. Pa duna un impresion kico e curso ta encera, KvK ta presenta e docentenan di e curso den un serie di relato di prensa. Esaki ta e promer y ta pa cera conoci cu señor Bert Vermaas, propietario di VCC Aruba.

Segun sr. Vermaas, locual ta diferencia e curso aki di tur otro ta su contenido superior y diversifica.

Señor Vermaas tin experiencia amplio ariba tereno di implementacion di software administrativo. Na aña 1992 el a inicia su compania ‘Application Software Aruba’ y pa motibo di crecemento despues a establece un compania internacional den Free Zone Aruba. Su relacionnan empresarial internacional actualmente ta existi na diferente pais, di Estados Unidos te Sur America, loke ta permitie di ta al tanto di desaroyonan internacional den ramo di tecnologia digital.
 
Pa e curso aki señor Vermaas ta encarga cu e modulo ‘Customer Relationship Management’ y ‘PayrollPro’. E ta comenta cu den transcurso di aña el a tuma nota cu den su database di cliente tin mas y mas persona di edad hoben cu ta cuminsa cu nan mes negoshi. Esaki riba su mes ta un bon desaroyo pero e pregunta cardinal ta si e hobennan aki ta habri un negoshi pa por realisa e meta di e compania, of si esaki ta nada mas cu un alternativa pa trabao. Hecho ta cu den un negoshi, specialmente negoshi chikito, no tin garantia di empleo y esaki ta un realidad cu hopi comerciante no ta tene cuenta cu ne. Segun Vermaas, e realidad aki ta trece cu ne cu un cantidad grandi di persona ta cuminsa cu un negoshi sin ta suficientemente prepara of no tin un business plan adecua. Consecuentemente, segun dato di Camara di Comerio, un porcentage halto ta cancela nan negoshi den menos di 1 aña. Esaki ta un lastima pa e compania y cu hopi biaha ta laga debe personal atras.

Pa e motibo aki sr. Vermaas ta di opinion cu ta importante pa empresarionan ta bon prepara pa e retonan cu bida empresarial ta trece y pues ta e motibo principal pa duna su aporte na e iniciativa di KvK. E curso ‘Empresario Independiente Chikito/Mediano’ ta brinda e oportunidad pa empresarionan ekipa nan mes cu e ‘tools’ pa preveni eror innecesario y asina yuda sigura exito di e empresario cual lo tin un influencia positivo riba economia di Aruba. 

Pa informacion tocante e curso y pa registra pa e curso na 2015, por bishita website di Camara di Comercio Aruba www.arubachamber.com

Aruba, 31 di October, 2014

Camara di Comercio y Industria (KvK)

 

By orbitalnets.com