Connect to Us LinkedIn Youtube RSS

28-2014 - KvK: Aruba como 'hub' posibel si drecha clima di inversion
  • PDF
  • Print
  • Email
Oranjestad, Camara di Comercio y Industria (KvK) tabatin diamars dia 14 di October ultimo un encuentro cu Prome Ministro Sr. Eman, encuanto e concepto di Aruba como “gateway” pa comercio di Europa, America Latina y region di Caribe. Punto di bista di KvK ta cu si Aruba mester tin un futuro como gateway, esaki ta intimamente mara na mehoracion drastico di e clima di inversion na Aruba, y esaki tabata punto di discusion den e entrevista cu Promer Ministro.
 
Entre otro a toca e tema di nos regimen fiscal, cu na e momento aki no ta mustra masha atractivo: nos tin e reputacion internacional di tin e tarifa mas halto na mundo di inkomstenbelasting (casi 60%), nos impuesto riba ganashi ta bastante halto (28%), riba esey ainda nos tin un dividendbelasting cu mayoria di nos competidonan den nos region (p.e. Curaçao y St. Maarten) no tin. Por mehora esaki, eliminando dividendbelasting, y reduciendo impuestonan directo manera riba ganashi y entrada personal, cobrando mas impuesto indirecto via BBO, BTW o algun otro forma di impuesto indirecto. Mester bisa si cu KvK no ta na fabor di un impuesto riba transaccion bancario, loke lo ser splica den otro publicacion proximamente, pasobra esaki ta un tema riba su mes.
 
Tambe a papia ampliamente riba mehoracion di e diferente procesonan pa yega na permiso, tanto pa empresa como pa personal. Aki KvK a trece dilanti pa considera converti e procesonan aki di tal manera, cu ora cu un ciudadano (empresa) despues di e termino stipula no haya un contesta, automaticamente mester otorga e permiso. Esaki lo yuda pa caba cu e procesonan di lunas cu ta un estorbo grandi pa sector priva.
 
A ser treci dilanti tambe e problemanan cu empresanan ta experimenta cu e tramitenan bancario, unda cu ta tarda tin biaha varios luna pa habri un cuenta na banco, pa motibo di e control excesivo previo cu ta tumando lugar; tambe e control excesivo cu banconan ta obliga di eherce pa no haya problema cu autoridad supervisor (CBA, MOT). Nos ta sumamente contento cu S.E. a compromete su mes pa organiza un deliberacion cu diferente stakeholder den e asunto aki, pa logra un solucion cu por satisface tur partido.
 
Tambe a keda acorda, en bista di e observacionnan di banda di KvK, cu lo trata na logra un participacion mas grandi di empresanan chikito local na e evento di Green Aruba – Europe Meets the Americas, pa medio di un entrada financieramente mas factibel y un evento di ‘networking’ pa fomenta contacto entre empresa local y empresa di exterior. 
 
Pa medio di carta di awe 17 di October KvK a participa na Prome Ministro, cu KvK ta dispuesto pa apoya e evento Green Aruba – Europe Meets the Americas, cu e condicion cu gobierno ta compromete su mes pa, hunto cu otro partinan interesa, cuminza cu atende e puntonan treci dilanti pa KvK, pa logra mehora e clima di inversion na Aruba pa tur inversionista, local y di exterior. KvK a elabora un lista extenso di punto cu merece atencion y cu segun KvK lo contribui na un mehor clima di inversion, y na mas facilidad y transparencia tanto pa empresa como pa e ciudadano individual. Proximamente KvK lo publica e lista aki, pa despues pasa na atende tur e puntonan a base individual.
 
Aruba, 17 di October 2014
Camara di Comercio y Industria (KvK)
 
 

By orbitalnets.com