Connect to Us LinkedIn Youtube RSS

25-2014 - KvK no ta participa na dialogo riba prijs di awa y coriente
  • PDF
  • Print
  • Email
Oranjestad, 4 september 2014 – Camara di Comercio y Industria (KvK) ta duna di conoce cu  e institucion aki lo no participa na e Dialogo Social tocante e situacion na nos empresanan local di awa y coriente (WEB Aruba NV y Elmar NV). E sesion aki ta programa pa tuma luga awe 4 di september, pa cual KvK a ricibi invitacion di banda di gobierno di Aruba.
 
E motibo principal pa no participa ta cu KvK ta considera cu, prome cu atende cualkier otro asunto, mester bin claridad di banda gubernamental tocante e problema cardinal di Aruba na e momento aki, cual ta e situacion financiero di gobierno. KvK ta considera cu ta na su luga pa gobierno di Aruba duna un exposicion extenso di e situacion actual den Dialogo Social, y tambe expone kico ta e plannan pa di un banda baha gasto, y di otro con ta pensa di aumenta entrada.
 
Den e cuadro aki lo ta importante tambe pa duna mas claridad riba e medidanan cu gobierno ta considera di bay tuma, manera loke por ehemplo ta ser comenta ampliamente den e dianan aki, un impuesto riba transaccion bancario (bank transaction tax). E anuncio di e impuesto aki a lanta hopi critica den comercio, mirando varios desbentaha cu esaki por trece cune. Por ehemplo un impuesto riba transaccion bancario lo pone nos economia bay bek den direccion di mas placa cash, mientras ta haci tanto esfuerso pa modernisa e servicionan bancario, y tambe mester tuma na cuenta e problemanan cu ta surgi, entre otro di seguridad pa persona y empresa den maneha cash. Tambe esaki por tin un efecto inflacionario bastante fuerte y lo aumenta burocracia si esaki ser introduci banda di tur impuesto cu ta exisiti caba.    
 
Ademas KvK ta di opinion cu esnan yama promer pa duna di conoce nan punto di bista publicamente tocante e situacion ta gerencia di e empresanan estatal cu ta produci awa y coriente (WEB y Elmar) y esun cu ta dirigi nan maneho (Utilities N.V.). No ta Dialogo Social mester aproba kico lo ta lo corecto pa haci den e situacion cu e companianan aki ta aden, ta na esnan apunta pa supervisa operacion di e companianan aki pa asumi nan responsabilidad. 
 
Camara di Comercio lo aprecia si gobierno duna oido na e yamado aki pa duna prioridad na un discusion franco y sincero den Dialogo Social tocante e situacion financiero gubernamental como proximo paso den Dialogo Social y despues eventualmente atende asuntonan secundario.    
 
Aruba, 4 september 2014
Camara di Comercio y Industria (KvK)
 
 

By orbitalnets.com