Connect to Us LinkedIn Youtube RSS

07-2011 - Camara di Comercio y Industria (KvK) ta anuncia mas detaye di su Expo International: Destination Innovation
  • PDF
  • Print
  • Email

Oranjestad – Camara di Comercio y Industria (KvK) ta ofreciendo compania local y internacional e oportunidad pa demostra y presenta nan producto, servicio y/o technologia innovativo durante un expo internacional dia 27 y 28 di mei proximo na Renaissance Convention Center.

Un di e metanan di e evento ta pa mustra con empresanan ta haciendo uso di innovacion pa asina sigui desaroya. E interes di parti comercio di Aruba y di empresanan internacional pa participa na e expo ta halto. Mas y mas compania innovador ta consiente cu e expo aki lo por habri portanan nobo pa nan producto, servicio o technologia tanto na nivel local como na nivel internacional. Paisnan manera Colombia, Panama, Merca, Corsow y tambe hermana isla Boneiro tin hopi interes pa participa. Esaki pa motibo cu e evento ta un oportunidad unico den region pa companianan local como internacional por sinja, intercambia y conoce otro ariba un plataforma dinamico.

Awe Camara di Comercio ta presenta tambe e logo di e evento. E nomber di e evento esta, Destination Innovation ta indica cu durante e evento e bishitante lo subi abordo di un viahe cu destinacion innovacion. E logo ta visualisa esaki por medio di un avion despegando for di Aruba y cu ta na caminda pa destinacion innovacion. Den e logo por mira rayonan cu ta simbolisa e lus di bida nobo cu innovacion ta trese pa companianan.

Innovacion ta e esencia di un desaroyo economico sostenible. Pa stimula e espirito innovador serca e futuro generacion, KvK a aserca Colegio EPI unit Ciencia y Technologia pa un cooperacion unico pa Destination Innovation. E participacion di Colegio EPI unit Ciencia y Technologia na e expo ta insera demostracion di e potencial di hobennan por medio di presentacion di e mihor 10 proyectonan di nan Science Fair. Tambe nan ta coopera pa un presentacion diferente di e areanan publico di e expo. Kico esaki ta bai nifica lo wordo divulga na e evento mes. Sigur ta cu e studiantenan lo traha hunto den diferente grupo pa presenta nan creatividad. Colegio EPI di su banda ta sumamente contento cu e asercamiento aki unda comercio y enseñanza ta copera cu otro y ta considera esaki como un bon oportunidad pa demonstra kico e unit di Ciencia y Technologia tin pa ofrece na un plataforma internacional.

Te cu awor tin 50% di e total di e boothnan bendi y regularmente ta ricibi registracionnan nobo. E participantenan ta consisti entre otro di un compañia cu a lansa un concepto nobo na nivel di trabow temporario, un otro ta desea di keda anonimo te na momento cu e ta lansa su productonan nobo ariba e mercado local y asina divulga su participacion na e expo.Tin participacion di un compañia cu representacion na Aruba, Corsow y Boneiro y tambe di un empresa di Merca. Actualmente negociashon ta andando cu Colombia, Corsow, Boneiro, Trinidad & Tobago.

Mirando e interes local y internacional cu tin pa participa na e Expo International Destination Innovation, Camara di Comercio ta invita companianan local innovativo pa no warda te na ultimo pa reserva. Pa mas informacion y/o registracion bishita nos website www.arubachamber.com of tuma contacto cu e Departamento Business Information & Support na 582.1566, ext. 27/35/42.2

Pa haya sa mas tocante con pa implementa innovacion den un empresa, KvK ta organisa un workshop ariba e tema aki. Esaki lo tuma lugar dia 29 di maart proximo den e auditorio na Camara di Comercio. Registracion adelanta ta necesario ya cu cupo ta limita.

Aruba, 22 di maart 2011
Camara di Comercio y Industria (KvK)

 

By orbitalnets.com