Connect to Us LinkedIn Youtube RSS

22-2014 - Procedura pa deposita cuenta financiero anual
  • PDF
  • Print
  • Email
Oranjestad, 14 di augustus 2014 – Camara di Comercio y Industria Aruba (KvK) ta recorda tur empresario tocante e obligacion pa tur NV, VBA y AVV deposita nan cuenta financiero anual (jaarrekening) na KvK dentro di 8 luna despues cu e aña fiscal termina. E obligacion aki a bira ley a base di recomendacion di FATF pa aumenta control ariba compania a base di capital (kapitaalvennootschappen) pa labamento di placa y financiamento di terorismo. E ley aki a bin na vigor na aña 2013. 
 
Pa esnan cu e aña fiscal ta core di januari pa december, e deadline pa deposita e jaarrekening ta 
31 di augustus. Mirando tur e preguntanan cu KvK ta ricibi, ta desea di comunica e procedura pa cu deposito di cuenta financiero anual y copia di registro di accionista. E comunicado aki lo splica con pa deposita e cuenta anual. 
 
Entrega di cuenta anual
Tur NV, VBA y AVV mester entrega un copia di nan cuenta financiero anual na Camara di Comercio. Esaki ta bay como lo siguiente:
E cuenta anual mester wordo firma door di tur director (het bestuur).
Si e compania tin un Junta di Supervision (Raad van Commissarissen), tur miembro mester firma e cuenta anual tambe.
Despues e asamblea di accionista ta aproba e cuenta financiero durante un reunion di accionista.
E reunion mester tuma luga dentro di ocho dia despues cu e documento keda cla.
Ademas, e compania mester warda un copia na nan oficina, cu semper mester tin un adres oficial na Aruba, cu den cierto caso por ta oficina di un representante legal. 
E periodo pa warda e documento ta diez aña. 
Tur accionista tin derecho ariba inzage na e sede legal di e compania.
 
Extension di periodo di aprobacion di cuenta anual
Si e director(nan) di e compania no ta logra presenta e relato dentro di ocho luna despues cu e aña fiscal termina na nan asamblea di accionista, nan por pidi un extension di e periodo (uitstel). Esaki ta bai como siguiente:
E directiva ta haci peticion di uitstel na e asamblea di accionista. 
E reunion di accionista ta decidi si ta honra peticion di directiva pa entrega e jaarrekening mas laat. 
E extension por ta te un maximo di seis luna.
Mester notula e reunion den cual e decision a ser tuma pa prolongacion (uitstel).
E director(nan) tin cu warda e notulen na oficina di e compania.
Ora e cuenta anual ta cla, e accionistanan mester aprobe durante un reunion di accionista.
Ta recomendabel registra e decision di asamblea di accionista pa pospone aprobacion na Camara di Comercio.
Despues di aprobacion di e cuenta anual door di e asamblea di accionista, mester deposita e cuenta financiero dentro di ocho dia na Camara di Comercio.
 
Casonan excepcional
Den caso cu e cuenta financiero ta keda cla net prome cu e deadline y no tin mas tempo pa tene e reunion di accionista, e ora e directiva mester firma e cuenta anual y deposite na KvK prome cu surpasa e deadline di ocho luna.
 
Tuma nota cu no ta pidi e extension na KvK, sino na e accionista(nan). KvK ta e instancia designa pa warda e cuenta financiero di cada compania. KvK no ta e instancia cu ta ricibi peticion pa uitstel y KvK no ta e instancia cu ta otorga e uitstel tampoco. 
 
Sin embargo KvK lo ripara ora un compania no a entrega su jaarrekening. Pesey ta consehabel, den caso cu e directiva di e NV, AVV of VBA haci peticion pa uitstel na su asamblea di accionista, pa notifica KvK di e decision aki, por ehempel door di deposita copia di e notulen na KvK.
 
E decision pa duna prolongacion por ser deposita na KvK, hunto cu formulario 16 y identificacion di un director.
 
Confidencialidad
E cuenta anual no ta un documento publico, y pues no lo ta disponibel pa inzage, excepto ora e compania mes duna autorisacion pa e ta parti di su file publico. KvK lo warda e documentonan confidencial aki den un area separa y sigur.
 
Contenido di e relato financiero anual
E documento mester contene e aspectonan basico di un relato financiero, esta:
- un balansa;
- un cuenta di beneficio y perdida (winst- en verliesrekening);
- un memoria explicativo (toelichting van balans en winst- en verliesrekening).
 
Tene cuenta cu e ley nobo ta introduci varios sancion pa yuda KvK eherce su tarea di warda e documentonan y e supervision di e proceso. Esaki ta inclui aumento di boetnan existente y control mas severo. Den un otro comunicado KvK lo splica mas den detaye tocante e consecuencianan.
 
Deadline
Por ultimo, ta importante pa añadi cu e deadline y e peticion pa extension, no ta igual cu esun di belasting. E motibo ta cu e deadline pa deposita e cuenta anual ta fiho, ocho luna despues cu e aña fiscal termina, tur aña. Belasting su deadline pa empresanan entrega nan aanslag di winstbelasting ta varia tur aña.
 
Tur empresario cu tin cualkier duda of ta desea di sa mas tocante e proceso nobo aki, por tuma contacto libremente cu KvK na 582-1566 ext. 21/22/27/30/35. Tambe por consulta nos website pa mas informacion, http://www.arubachamber.com/business-in-aruba/filing-of-the-annual-financial-statement.
 
Aruba, 14 di augustus 2014
Camara di Comercio y Industria (KvK)
 
 

By orbitalnets.com