Connect to Us LinkedIn Youtube RSS

19-2014 - KvK: Negoshi registra entre Januari – Juni 2014
  • PDF
  • Print
  • Email
Oranjestad – Camara di Comercio y Industria (KvK) ta presenta un resumen di e cifranan di registracion di empresa nobo pa e promer seis luna di aña 2014. Registracion di empresa nobo na Registro Comercial a yega na un total di 614 empresa onshore, mientras cu a registra tambe 3 empresa offshore, total 617. Compara cu e mesun periodo di aña 2013, unda a registra un total di 673 empresa nobo, esaki ta significa un bahada di 8,3%. Si proyecta e cantidad di empresa registra den promer seis luna di 2014 riba henter aña, nos lo cay bek na un nivel parecido na 2012, unda a registra solamente 1212 empresa onshore. Esaki ta cerca di e nivel di menos di 1200 empresa pa aña cu a mira desde 2009, a consecuencia di e crisis financiero-economico global di 2008/2009.
 
 
Un aspecto remarcable ta cu na 2014 pa promer biaha ta registra mas VBA cu NV. Mientras na 2013 den e mesun periodo ainda tabatin 136 NV y solamente 76 VBA registra, na 2014 definitivamente esaki a cambia na fabor di e VBA: 134, compara cu NV: 128. Den e tabel por mira cu tin mas empresa formalisa den un persona huridico, sea NV of VBA, compara cu añanan anterior. Claramente e VBA como forma legal a gana popularidad entre esnan cu ta desea di lanta un empresa mas formal y ta aprecia e opcionnan mas diverso y e costo mas abao di e VBA.
 
 
Crecemento economico modera
Ta demasiado tempran ainda pa bisa algo cu certeza con e di dos parti di aña lo bay y tambe pa por predeci algo tocante e rumbo di nos economia. Loke ta conoci te awor di cifra riba diferente entrada di gobierno cu ta sirbi como indicador con economia ta andando, por bisa cu segun Banco Central di Aruba tin un aumento considerabel di loonbelasting (16,5%) den promer cinco luna di aña. Esaki por ser causa parcialmente pa pago incidental di loonbelasting, manera den terminacion di contract cu e grupo di trahador na Westin Hotel. 
 
BBO tambe ta mas halto cu e nivel den e mesun periodo di 2013 (+5,3%), mientras cu impuesto di importacion a baha cu 2,2% den e periodo menciona. Accijnzen pa tabaco, likeur y cerbes a subi levemente (1,7%). Esaki por ta indicacion cu tin cierto crecemento economico, pero ta dificil ainda determina cuanto esaki lo ta pa fin di aña. 
 
Pa loke ta entrada di gobierno den e periodo di cinco luna aki, por mira cu entrada total di impuesto a subi cu 2,6%. Entrada total sinembargo a cay cu casi 10% (9,88), esaki primordialmente a base di un cobranza bastante reduci di dividend di e empresanan estatal, contrario na aña 2013. Si sigui e rumbo aki, 2014 en total por trese aden alrededor di Afl.1055 miyon, cu ta Afl. 95 miyon menos cu e entrada calcula den presupuesto 2014 (Afl. 1150 miyon).
 
Pago atrasa di gobierno afectando comercio
Situacion financiero preocupante di gobierno ta sigui afecta circulacion di placa den nos economia. Esaki a traves di e tardanza den pago na creditornan di gobierno, cu na su turno ta afecta tambe pago di nan creditornan. E ley di emergencia aproba recientemente pa autorisa fianza pa un suma di Afl. 339 miyon, pa cubri necesidad financiero di gobierno pa 2014, a habri e posibilidad pa haya fondo adicional pronto. Esaki por trese alivio pa sector priva. 
 
Tambe por observa cu mayoria di e proyectonan grandi (PPP) cu a ser anuncia, no ta den fase di ehecucion ainda. Por lo tanto no lo mira un ‘spin off’ di esakinan, cu estimulo di empleo y poder di compra den economia. Tampoco esaki ta yuda pa aumenta entrada di gobierno, cu ta haya un cierto parti di e crecemento economico den forma di mas impuesto. Esaki por tin como consecuencia cu mester revisa e expectativanan pa e aña aki di e crecemento economico. 
 
Banco Central di Aruba tabata spera un crecemento di 3% nominal di Producto Interno Bruto (PIB, GDP) pa 2014. Den su evaluacion reciente, Fitch Ratings ta mantene expectativa di un crecemento di 2,6% real. No ta bisa si esaki ta teniendo cuenta of no cu ehecucion di e proyectonan PPP.
Di tur manera, pone un fin na e incertidumbre encuanto presupuesto 2014 ta parce primordial pa restablece confianza den economia. 
 
Aruba, 31 di juli 2014
Camara di Comercio y Industria (KvK)
 

By orbitalnets.com