Connect to Us LinkedIn Youtube RSS

15-2014 - Camara di Comercio no ta apoya aumento BBO of Prima AZV: Ta urgi gobierno reduci gasto di personal promer
  • PDF
  • Print
  • Email
Oranjestad – Den e siman cu a transcuri, Camara di Comercio y Industria (KvK) a participa na Dialogo Social, den cual a ser trata e tema di AZV, mas specificamente financiamento di gastonan di e entidad aki actual y pa futuro. Den e deliberacion aki a ser haci, di banda di gobierno, e proposicion pa sea aumenta prima di AZV cu 3%, pa ser paga pa empleado y dunador di trabao, o introduci un cobransa di 1% di un omzetbelasting manera BBO, cual lo ser paga pa tur consumidor, destina na cubri aumento di gasto di AZV. E pensamento ta cu 1% di BBO na e momento aki ta genera entrada equivalente na 3% di prima di AZV.
 
Den su reunion di diabierna 13 di juni, Camara di Comercio a yega na e posicion cu no ta apoya ningun aumento, ni di prima, ni di impuesto, relaciona cu AZV, a menos cu mira un reduccion sustancial den gasto di personal di gobierno. En general Camara di Comercio no ta na fabor di ningun aumento di gasto, no pa sector priva y no pa pueblo en general na e momento aki, teniendo na cuenta e efectonan negativo cu esaki lo bay tin pa nos economia. 
 
Manera proyecta den presupuesto 2014, e reduccion den gasto di personal ta minimo, mientras cu ta e gastonan aki ta e riesgo grandi pa finanza publico. Mientras cu gasto di personal ta mas o menos 75% di gasto di aparato, gobierno tin programa pa corta solamente 2% den esaki. Di otro banda ta corta alrededor di 20% den bienes y servicio, cual ta bay causa y ta causando caba problema di operacion grave pa varios entidad gubernamental. Camara di Comercio ta desea di haci special referencia, mescos cu Raad van Advies a haci,  na e cantidad grandi di persona contrata directamente pa e ministronan na nan despacho, banda di e funcionarionan publico den e departamentonan, cual a yuda ocasiona actualmente un payroll insostenibel di 7500 salario pa luna pa paga (entre ambtenaar, contractant y sector subsidia), cu no ta cuadra cu e tamaño di nos pais y su poblacion, y tampoco cu e tamaño di nos forsa laboral den sector priva, cu mester aporta pa paga esaki.
 
Tambe mester tuma na consideracion cu aumento di sea prima o impuesto, lo añadi na e gastonan pa trahador, dunador di trabao y ta un sacrificio extra di nos economia, mientras cu no ta mira un esfuerso suficiente di banda di gobierno pa corta gasto na unda e gastonan ta. Tanto local como internacional, awor ta e momento pa Aruba duna un señal cla cu Aruba ta serio den ataca e problema financiero grave cu no solamente ta concerni gobierno, sino henter nos comunidad. 
 
Banda di e posicion aki, Camara di Comercio ta desea di confirma su compromiso pa sigui delibera, den Dialogo Social o di cualkier forma necesario, na bienestar di comercio y industria, y di bienestar general.
 
Camara di Comercio y Industria (KvK)
15 Juni 2014  
 

By orbitalnets.com