Connect to Us LinkedIn Youtube RSS

05-2011 - Charla di camara di comercio den 2011
  • PDF
  • Print
  • Email

Oranjestad – Pa varios aña caba, Camara di Comercio y Industria Aruba (KvK) regularmente ta organisa charla cu e meta pa yuda crea empresario exitoso. Durante e ultimo añanan e enfoque tabata principalmente ariba e empresario nobato. Pa e aña aki, KvK ta organisando varios charla interesante pa no solamente esnan cu a caba di start nan negoshi, pero tambe lo tin charla special pa empresario cu a pasa den e fase inicial caba.

Un di e responsabilidadnan di KvK ta pa informa y sostene empresario local. Pa e motibo aki KvK ta presenta varios tema pa informa empresarionan y tene nan up to date cu e desaroyo cu ta relevante pa nan. Temanan cu lo bin dilanti e aña aki lo ta e.o. con pa traha un estudio di factibilidad (feasibility study); kico e ley di consumidor ta nifica pa e empresario; posibilidadnan pa empresario local; tecnica di presentacion y do's & don'ts ora di haci oferta ariba un tender. Tambe lo toca e tema di siguridad pa empresa.

Den cuadro di KvK su meta pa stimula inovacion empresarial y su expo internacional Destination Innovation, lo organisa un workshop tocante entrepreneurship y inovacion dia 29 di maart proximo. Sr. Edward Erasmus, docente part-time na Universidad di Aruba lo tuma esaki na su encargo. E workshop lo ta basa ariba un estudio haci specificamente tocante e tema aki.

Varios di e charlanan ta wordo duna pa personal di KvK mes pero tambe ta invita experto di diferente instancia y/o empresa specialisa pa comparti nan conocemento cu esnan presente. E aña aki esey lo inclui entre otro SIAD y un compania di seguro.

E charlanan di KvK, aunke nan ta dirigi primeramente ariba empresarionan, ta relevante tambe pa tur esnan cu ta considerando pa habri nan propio negoshi y pa publico en general. E charlanan, como tambe otro actividad di KvK, ta aparece ariba e activity calendar di KvK su website, www.arubachamber.com. Pa esnan cu kier ta sigur di no falta un charla, por manda un email na This e-mail address is being protected from spambots. You need JavaScript enabled to view it y pidi KvK pa añadi nan emailadres na un mailinglist, y di e forma aki nan por ricibi un invitacion prome cu e aviso di e charla wordo publica.

Diamars 22 di Februari lo tin un charla di plan di pension y seguro pa negoshi cu lo wordo duna door di un compania di seguro. Pa mas informacion tocante e charlanan of otro servicio di KvK por tuma contacto libremente cu e departamento Business Information & Support na 582-1566, ext. 27 of 35.

Aruba, 22 di februari 2011
Camara di Comercio y Industria (KvK)

 

By orbitalnets.com