Connect to Us LinkedIn Youtube RSS

14-2014 - Servicio di recoge sushi: un debate (in)necesario?
  • PDF
  • Print
  • Email
Oranjestad – Recientemente a keda anuncia cu pa iniciativa di gobierno, servicio estatal Serlimar lo cuminza cobra cada adres na Aruba un suma mensual di Afl. 25,- pa recoge sushi. Inmediatamente a surgi e discusion con ta para cu e caso di hende o empresa cu ya tin un contrato cu un compania priva pa recoge sushi. A ser anuncia cu den tur caso e usuario lo debe Serlimar e suma aki, independientemente ken ta recoge sushi en realidad.
 
Pa un instante tabata parce cu e asunto lo por bira un caso den corte, si e partidonan envolvi no por yega na un acuerdo pa soluciona e situacion aki na mesa. Camara di Comercio y Industria (KvK) ta di opinion cu no mester yega asina leu, y cu mester analisa e asunto aki cu mente claro y sin recuri na sentimento. Y pa esey ta necesario bolbe na inicio di henter e proceso, unda pa hopi aña servicio di gobierno tabata e unico servicio di recoge sushi na Aruba. Ningun hende tabata cuestiona esey tampoco, simplemente no tabatin ningun otro empresa interesa den brinda e servicio ey.
 
Despues a surgi e interes den sector priva, y a bin un cambio den maneho di gobierno, y a duna espacio na companianan priva pa cuminza opera den e sector aki. No ta importa bao di cual gobierno esaki a tuma lugar pasobra mester tuma como punto di salida cu nos sistema legal conoce loke ta ser yama “continuidad di gobernacion”, es decir cu decision y compromiso haci den nomber di Pais Aruba ta compromiso legal cu ta mara tur siguiente gobierno di turno.
 
Si nos tira un bista riba e ley introduci na 2005, bao di cual Serlimar ta funciona, y riba e memoria explicativo (Memorie van Toelichting) di esaki, ta completamente obvio cu gobierno na e momento ey no tabatin intencion di stroba e companianan priva pa sigui cu nan operacion. E siguiente frase ta parti di e memoria:” Ta ser ripiti cu, no ta intencion cu esaki, pa exclui empresanan priva di recogemento di sushi cu ta opera caba, di recoge sushi cerca ciudadano. Relaciona cu esaki, gobierno tampoco ta considera necesario cu sushi di empresa obligatoriamente ta ser recogi pa e Empresa. Riba e punto aki de hecho ta mantene e situacion existente.” (Pag. 16 di Memorie van Toelichting di Landsverordening Instelling Servicio di Limpieza di Aruba).
 
Cu esaki a keda claramente ilustra cu desde un inicio, gobierno no tabatin intencion di toca e posicion di e empresanan priva cu tabata operando caba riba e tereno aki. Bolbiendo pa e discusion di awe, lo ta logico pa tuma posicion di e empresanan priva aki na cuenta awor tambe. Ningun ciudadano, cu tin e libre escogencia ken e ta contrata pa recoge sushi na su adres, sea di cas priva o empresa, lo aprecia di mester paga dos biaha pa un solo servicio, y esaki lo ta inhusto tambe. Por lo tanto, mester yega na un areglo con ta haci pa cada empresa cobra su cliente, y cu cada cliente ta ser cobra un biaha so. Claro cu mester percura pa ningun adres of punto di recoge sushi keda sin servicio di limpieza. Esey obligatoriamente lo trece cune, cu esnan cu no tin un contrato cu un compania priva, mester tin servicio di Serlimar y paga pa esey tambe. Esaki pa evita cu cualkier cas of negoshi ta keda sin servicio, cu tur consecuencia pa higiena publico.
 
Tumando na cuenta tur esaki, no por ta otro cu mester bin cu un sistema di registracion, unda tur usuario cu contrata un servicio priva mester ta conoci na Serlimar, pa evita cu nan ta ser cobra dos biaha. Tur demas adres y punto di recoge sushi obligatoriamente lo ser cobra pa Serlimar, garantisando asina cu ningun adres ta keda sin servicio di recoge sushi. Ta di spera cu pronto e partidonan envolvi lo por sinta na mesa y yega na un solucion den e direccion indica aki. 
 
Aruba, 12 di juni 2014
Camara di Comercio y Industria (KvK)
 

By orbitalnets.com