Connect to Us LinkedIn Youtube RSS

04-2011 - KvK ta cla pa su expo internacional destination innovation
  • PDF
  • Print
  • Email

Oranjestad – Tur cos ta cla pa Camara di Comercio y Industria (KvK) su Expo International Destination Innovation, cu tin como meta pa inspira tur participante dor di hiba nan den un biahe increibel cu destinacion inovacion ariba dianan 27 y 28 di mei proximo na Renaissance Convention Center.

Destination Innovation lo sirbi como un plataforma unda empresario local y internacional lo topa otro pa expone nan producto y servicio inovativo, siña di otro y "netwerk". Inovacion ta un parti esencial pa tur negoshi, grandi y chikito, sigui desaroya. Inovacion por ta e introduccion di un producto of servicio nobo, den un empresa nobo of uno existente, pero e por ta tambe mehoracion di manejo of di servico y/o productividad, cu ta duna bida nobo na un empresa. Ta pesey esaki sigur ta un evento cu tur empresario cu ta desea di realiza inovacion mester forma parti di dje.

E evento ta consisti di dos tipo di actividad. E prome seccion ta e expo, unda tur compania participante lo expone nan producto of servicio inovativo na publico. Den un segundo seccion, e participante ta haya e oportunidad pa comparti "success stories" y "best practices" di su negoshi na publico presente.

Participacion internacional

Ya invitacion a wordo manda pa companianan internacional. KvK a acerca varios companianan inovativo rond mundo pa asisti na e evento unico aki cu sigur lo yuda Aruba pa tuma e pasonan necesario pa inova y desaroya comercio sostenibel. Tambe KvK a acerca varios di su contactonan internacional manera otro KvK's pa via nan, mas compania inovativo den region y di otro continente por haya e oportunidad pa participa.

Destination Innovation lo demonstra tur participante y bishitante iniciativanan local y internacional. E ta un expo exclusivo unda lo tin 30 booths disponibel, special pa inovadornan cu realmente kier resalta entre tur competencia.

Con pa registra

Esnan interesa den participacion por tuma contacto cu KvK of por registra online, www.arubachamber.com. Boothnan ta disponibel desde Afl. 752,50. Consulta nos website pa e diferente pakete y condicion cu KvK ta ofrece. Tambe tin oportunidad pa bira sponsor di e evento grandi aki.

Pakico participa como expositor

Destination Innovation lo inspira empresario desde momento cu nan pone pia a bordo di e vuelo inovativo. E interaccion entre empresarionan local y internacional sigur lo habri un mundo nobo di solucionnan interesante pa yuda diversifica y engrandece negoshi. Ademas e expo ta un forma ideal pa conoce business partners, suppliers, cliente of inversionista potencial.

Pues tur empresario cu por medio di inovacion kier engrandece nan mercado, mehora nan servicio y producto, alcansa mas cliente y finalmente hisa e valor di su compania no por keda sin atende Destination Innovation. Pa mas informacion y/of registracion, consulta nos website www.arubachamber.com/events/2011/Expo2011May27-28.htm of tuma contacto cu e Departamento Business Information and Support na 582.1566, ext. 27/35/42.

Aruba, 22 di februari 2011
Camara di Comercio y Industria (KvK)

 

By orbitalnets.com