Connect to Us LinkedIn Youtube RSS

03-2011 - KvK a revisa criterio pa conseho riba permiso di establecimento
  • PDF
  • Print
  • Email

Oranjestad – Recientemente Camara di Comercio y Industria (KvK) a revisa su criterionan cu ta ser maneha den dunamento di conseho segun ley riba cada permiso pa negoshi cu Departamento di Asunto Economico, Comercio y Industria (DEZHI) ta otorga. E departamento ta haci esaki como un facultad legal concedi na ministro encarga cu Asunto Economico y duna como mandato na director di DEZHI. Cada dos aña KvK su directiva ta tira un vista critico riba e criterionan cu ta sirbi como orientacion pa su consehonan. E consulta obligatorio di KvK ta concerni tur tipo di permiso, cualnan ta encera permiso pa establecimento di e empresa mes, y ademas permiso pa director, pa cambia o amplia e metanan di e empresa, y tambe mudanza di e empresa y cambio di e condicionnan menciona den su permiso. Revocacion di e permiso tambe ta requeri consulta di KvK. No ta obligatorio pa sigui e conseho di KvK.

Punto di salida pa KvK den su consehonan ta pa trata di stimula un crecimento economico harmonioso y controlable, en vista di e tamano reduci di nos teritorio; tambe pa logra un desaroyo duradero y sostenible, entre otro via diversificacion y inovacion. Stimula y reforza empresario local tambe ta meta den e esfuerzo aki.

Den e ultimo revision cu a termina, a keda inclui entre otro adicion di criterio encuanto:

  • suficiente conocimiento dentro di e empresa pa dirigi e actividad economico: esaki por ta cerca e director o otro empleado; contal cu e knowhow necesario ta garantiza.
  • Lugar di establecimiento: tuma na cuenta criterio y norma di Ordenanza Estatal riba Desaroyo Teritorial, mas detaya e Ruimtelijk Ontwikkelingsplan (ROP) y e ROPv (ROP met voorschriften). E ultimo aki ta encera e bestemmingsplan detaya pa cada zona y no ta traha y aproba ainda.
  • A modifica e maneho pa negoshi den vivienda y zona residencial, permitiendo cierto negoshi cu no ta duna molester, pero manteniendo conseho negativo pa otro empresa. Excepcion ta haci tambe pa caminda grandi den bario unda ya tin cierto desaroyo comercial.

Tambe a criterio nobo pa actividad cu ta merece estimulo:

  • Actividad cu ta crea empleo di calidad halto; cu nivel alto di educacion y salario corespondiente.
  • Actividad productivo cu no tin como consecuencia importacion di trahador for di extranhero.
  • Atencion special pa actividad economico cu ta cay den e zonanan cu mester estimulo, manera centro di San Nicolas y Oranjestad.
  • Actividad relaciona cu energia renovable y cu inovacion.

Cierto actividadnan ta keda menos deseable, tambe en vista di "Carrying Capacity". Esaki ta e caso di hotel, timeshare y condominium. Ta spera cu e moratorio cu ta den preparacion pa e proximo añanan yega na vigor pronto. Excepcion por ser haci pa asina yama "boutique hotels", si ta yega na un definicion aceptable di e termino aki. KvK ta propone como definicion: hotel chikito cu maximo 30 camber y di calidad halto segun standard internacional.

 

By orbitalnets.com