Connect to Us LinkedIn Youtube RSS

07-2014 - Aruba Chamber Business Event
  • PDF
  • Print
  • Email

Oranjestad – Diamars dia 15 di april proximo, Camara di Comercio y Industria (KvK) lo organisa su promer evento anual grandi pa 2014 den un formula nobo, cual lo ta un Business Meeting Event bao di e titulo: TRANSFORMING OUR BUSINESS CLIMATE na Hyatt Regency Aruba Resort & Casino.

Concepto nobo
Di e forma aki, den un set up diferente, KvK ta continua cu su tradicion di organisa un evento anual grandi, cual te recientemente tabata e conocido Annual Business Dinner Meeting. Na aña 2013 a dicidi di no tene e Business Dinner, esaki en vista di a organisa dos evento grandi caba den e aña ey, cu hasta a bay television en vivo, cu hopi exito den ambos caso. Esakinan tabata e seminario tocante e tema “Aruba without the Refinery” na maart, y e debate electoral grandi hunto cu ATIA, na augustus 2013.

E aña aki a analisa internamente tocante e formato di e Business Dinner y a scoge pa cambia esaki. Pa 2014 lo bay tin un Business Event dirigi na e mesun publico y den cual ta mantene e elementonan clave cual ta un discurso di presidente di KvK cu ta elabora riba e situacion economico di nos pais, y un “keynote speaker” cu lo ta e centro di atencion di e anochi cu un tema hopi relevante pa nos economia.

Keynote speaker
Pa e aña aki KvK a logra haya como keynote speaker prof. dr. Michiel de Vries, docente Bestuurskunde na Radboud Universiteit na Nijmegen, Hulanda, desde 2000 te cu awe. Tambe entre 2011 te awor e ta docente na Universidad di Aruba, relaciona na e asina yama “Gouverneursleerstoel” instituí pa nos Gobernador, S.E. Fredis Refunjol, pa e topico “Openbaar Bestuur in Kleinschalige Rechtsordes”.
E tema cu prof. de Vries ta analisa especialmente pa e Business Event di KvK ta e clima empresarial na Aruba y con pa mehora esaki. Pa esaki actualmente ta tuma lugar un encuesta bao di empresarionan na Aruba.

Meta
Camara di Comercio su meta ta pa logra crea un sinergia entre e resultado di e estudio di Prof. De Vries y e aporte di empresarionan pa nos transforma nos isla den un pais mas atractivo pa tur esnan cu ta inverti, local y internacional, sigurando un futuro mas prometedor pa nos tur.

Den e ultimo añanan esfuerzo grandi ta ser haci pa realiza un posicion den nos region como un “hub” pa comercio internacional, especialmente entre America Latina, Europa y region di Caribe. Banda di e esfuerzonan aki, nos mester analisa tambe kico por mehora na Aruba mes den nos manera di haci negoshi, y con pa facilita haci negoshi pa tur empresario, tanto e posible inversionista di exterior, como e empresario local. Pa esaki nos por pensa riba nos regimen fiscal, areglonan aduanero, proceso di tramite di permiso pa empresa, incentivo pa cierto sectornan clave, etc. KvK tin tur confianza cu prof. de Vries lo sa di ilustra e tema aki na un manera profesional y acogedor. Tambe lo lo tin e posibilidad pa e publico participa directamente den un debate cu sr. De Vries despues di su presentacion.

Networking
Lo clausura e anochi cu un “networking reception” den un espacio separa, unda e participantenan por continua e debate cu prof. de Vries, y cu presidente y board di KvK, o haci uso di e oportunidad pa haci “networking” entre nan. Mientras tanto por disfruta di premium drinks y hors-d'œuvres.

No perde e evento aki! TRANSFORMING OUR BUSINESS CLIMATE lo tuma lugar na Hyatt Regency Aruba Resort & Casino, diamars 15 di april, 2014, di 7’or te cu 10:30 di anochi.

Tickets ta disponibel na KvK pa Afl.100 pa persona. Esnan interesa por tuma contacto cu e departamento di Secretariado na telefon 582.1120 pa haci reservacion. Tambe por haci reservacion atraves di:
www.arubachamber.com .


Aruba, 20 di maart 2014
Camara di Comercio y Industria (KvK)

 

By orbitalnets.com