Connect to Us LinkedIn Youtube RSS

06-2014 - Entrante diamars 4 di maart 2014 KvK ta habri tur diamars anochi te 8’or
  • PDF
  • Print
  • Email
Oranjestad – Camara di Comercio y Industria Aruba (KvK) ta anuncia cu entrante 4 di maart 2014, nos lo ta habri tur diamars anochi te cu 8’or. E flexibilidad aki den nos orario ta permiti nos brinda mihor servicio na empresario y publico en general.
 
E apertura di tur diamars anochi ta un pilot project unda Camara di Comercio lo ofrece servicio specialmente na tur hende pa ken ta dificil pa pasa durante orario regular di oficina.
 
Den cuadro di e pilot project KvK lo duna servicio basico na esnan cu ta bishita KvK durante e anochinan aki. E servicionan ta inclui sesion di informacion y registracion di negoshi nobo. Registracion lo ta abase di afspraak. Tambe por busca y/of bestel diferente documentonan manera uittreksel, declaracion, etc.
 
KvK kier enfatisa cu e caha lo cera 7:45 pm y ta pidi tur cliente pa tene cuenta cu e orario.
 
Ademas KvK lo probecha di e orario extra pa ofrece mas charla y/of workshop informativo. Esnan cu ta conoci cu e charlanan di KvK, sa cu KvK ta ofrece charla/workshops durante oranan di lunch of tempran den oranan di atardi. Cu e orario extra, nos lo cuminsa ofrece charlanan mas laat, di 5’or pa 7’or, pa asina por yega na un grupo mas amplio di empresario interesa.
 
Nos orario nobo lo ta:
Dialuna, diaranson, diahuebs y diabierna di 8:00 am – 4:30 pm.
Diamars di 8:00 am – 8:00 pm.
Tur dia nos ta habri non-stop, sin cera merdia.
 
KvK ta spera cu publico lo haci bon uso di e oportunidad aki. E apertura ariba diamars anochi ta wordo inicia den cuadro di nos meta pa eleva nos servicio y sosten na e cliente y informa e empresario mihor ariba topiconan cu ta relevante pe.
 
E experimento aki lo tin un duracion di algun luna, despues di cual lo tin evaluacion pa sa si realmente e servicio extra aki ta cumpli cu un necesidad di banda di e empresario.
 
Pa mas informacion, check nos facebook.com/arubachamber of tuma contacto cu nos na 582-1566.
Of por consulta nos website pa mas informacion, www.arubachamber.com.
 
 
Aruba, 18 di februari 2014
Camara di Comercio y Industria (KvK)
 
 

By orbitalnets.com