Connect to Us LinkedIn Youtube RSS

04-2014 - Empresarionan contento di a bishita Business Plaza
  • PDF
  • Print
  • Email

Oranjestad - Diasabra, 18 di januari a tuma lugar Camara di Comercio (KvK) su segundo edicion di Business Plaza - Step Forward! E evento tabata dirigi ariba empresario cu kier expande nan negoshi y a ofrece un programa extenso pa duna tur tipo di informacion cu empresarionan tin mester. Business Plaza a wordo realisa danki na sponsor di Setar NV.

E programa tabata inclui varios presentacion y workshop y e dia a wordo habri door di Vice-Presidente di KvK, Sra. Lindsey Wever, ken a papia tocante e importancia di cambio continuo y planifica den negoshi. Seguidamente, Sra. Roxana Ras, representante di Setar NV a duna un presentacion na e grupo di empresario presente tocante e solucionnan cu Setar por ofrece pa yuda nan negoshi crece.

E aña aki a decidi pa adapta e programa, y a schedule tur e presentacionnan durante ora di mainta. Atardi a organisa dos workshop cu tabata tuma lugar simultaneamente. Esaki ta algo cu mayoria participante a aplaudi mirando cu asina nan por a atende e workshop sin worry cu nan ta perde algun presentacion.

E presentacionnan e aña aki tabata sumamente interesante. Sr. Omar Steve Lejeuz a conta su experiencia di e pasonan cu e a tuma pa laga su negoshi crece. Despues director ehecutivo di KvK, Sr. Leo Maduro a conta tocante e cambionan den ley laboral y e posibilidad pa traha parttime y su beneficionan pa e empresario y empleado. Sigui pa Sra. Milly Schwengle kende a conta tocante NV y VBA, e diferencianan y kico ta e posibilidadnan cu e dos tipo di negoshi aki. Sr. Stanley Brown a comparti su experiencia pa forma aliansa cu otro compania y asina crece. Finalmente, Sra. Marielle Hoeijmakers a elabora un poco tocante Aruba DOET y con bo ta hacie parti di bo responsabilidad social corporativo.

Camara di Comercio kier bisa danki na tur e profesionalnan cu a comparti nan conocimento por medio di e presentacionnan. Danki na Sres. Dave Martinus y Benno Oldenhof pa nan tremendo workshop duna na e publico. Tambe na e representante di Departmento di Asunto Economico y CEDE Aruba pa nan contribucion na e evento aki y tur otro hende cu a coopera pa e Business Plaza bira un exito.

Camara di Comercio kier anuncia cu e aña aki nos enfoke lo ta ariba varios asunto cu ta importante pa haci e tramite pa e empresario mas facil y cu por medio di sessionnan hunto cu doñonan di negoshi nos kier yega na posibel solucionnan. Mas informacion lo sigui despues.

Por ultimo, na tur esnan cu kier cuminsa cu nan negoshi, Business Plaza, Get started, ta programa pa diasabra, 5 di juli, 2014. Keda pendiente!

Aruba, 23 di januari 2014
Camara di Comercio y Industria (KvK)

 

By orbitalnets.com