Connect to Us LinkedIn Youtube RSS

10-2013 - Reserva e fecha diasabra 6 di juli - KvK ta presenta: Business Plaza Get Started!
  • PDF
  • Print
  • Email

Oranjestad, 25 di juni 2013 – Bo ta pensando di habri un negoshi of bo a caba di inscribi bo negoshi? Diasabra 6 di juli 2013, Camara di Comercio e Industria Aruba (KvK) ta organizando su segundo edicion di Business Plaza Get Started! E evento lo ta gratis y ta cuminsa di 10’or di mainta te 3’or di atardi na Camara di Comercio. Sponsor di Business Plaza ta Aruba Bank.

Manera aña pasa, Business Plaza Get Started! ta specialmente pa tur esnan cu kier habri un negoshi of a caba di start un negoshi nobo. Business Plaza ta ofrece tur e informacion necesario pa Get Started, di momento cu bo haya bo business idea te realisacion di negoshi y guia pa por maneha e negoshi nobo.

E aña aki atrobe lo tin varios experto invita pa comparti nan experticio cu tur presente, creando oportunidad excelente pa fomenta concientisacion cu kico tur mester tene cuenta na momento di cuminsa un negoshi. Tambe Business Plaza ta brinda oportunidad pa ‘netwerk’ cu profesionalnan den posicion clave pa yuda e empresario nobato den e proceso aki.

Business Plaza ta tuma lugar na Camara di Comercio, unda lo tin diferente stand di informacion, consultorio priva pa esnan cu ta desea di ricibi informacion mas concreto y personal. Durante e evento lo tin varios negoshi y organisacion cu lo duna un presentacion. Ariba nos website www.arubachamber.com, por wak e orario cu e presentacionnan lo tuma lugar.

Expertonan invita lo duna tur presente informacion tocante e startup di negoshi, marketing, administracion, permiso necesario, proteccion di nomber y trademarks di bo negoshi. Ademas Business Plaza a invita un empresario hoben cu a cuminsa cu su negoshi algun aña pasa pa duna un presentacion tocante experiencia ora di cuminsa cu negoshi pa empresario nobato.

Naturalmente, mescos e edicionnan anterior, e dia aki tambe lo tin workshops continuo pa business planning, presenta door di AIB Bank, y financial bookkeeping, presenta pa Plus Accountants. Tambe lo ta presente Depto. di Asunto Economico, cu lo splica mas tocante e procedura di aplicacion pa permiso di establecimento di negoshi.

Pa mayornan no tin motibo pa falta e evento y por busca informacion y netwerk trankilo; lo tin un dinojump pa entretene nan yiu. Lo tin cuminda y bebida disponible. Business Plaza ta completamente gratis y ta entre 10’or di mainta y 3’or di atardi na Camara di Comercio. Manera ya menciona sponsor di e evento ta Aruba Bank.

Tur esnan interesa pa atende Business Plaza por sigui updates di e evento via nos website. Pa mas informacion y registracion, contact nos na This e-mail address is being protected from spambots. You need JavaScript enabled to view it of www.facebook.com/arubachamber. Mas cu claro por yama nos na 582.1566, ext. 27/30/35/42.

Aruba, 25 di juni 2013
Camara di Comercio y Industria (KvK)

 

By orbitalnets.com